Бұл игі шара Наурызнама онкүндігіндегі «Тазару күнімен» үйлесім тауып, табиғатты аялаудың жарқын үлгісіне айналды. Су ресурстары және ирригация министрлігі мен облыс әкімдігі ұйымдастырған акцияның негізгі мақсаты — су көздерін қоқыстан тазарту, экологиялық мәдениетті нығайту және жастарды қоршаған ортаға жанашырлықпен қарауға тәрбиелеу.
Жамбыл ауданындағы Жалғызтал бұлағының көзін ашу жұмыстарына Су ресурстары және ирригация министрі Нұржан Нұржігітов пен облыс әкімі Ербол Қарашөкеев арнайы қатысып, аумақты көгалдандыруға атсалысты. Бұл жұмысқа «Болашақтың қайнары» атты жаңа еріктілер қозғалысы мен Қазақ ұлттық су шаруашылығы және ирригация университетінің студенттері үлкен серпін берді. Министр Нұржан Нұржігітов бұл волонтерлік қозғалыстың еліміздегі су саласына бағытталған алғашқы бастама екенін және оның Тараз қаласынан бастау алуының өзіндік символдық мәні бар екенін атап өтті.
Шара барысында өңірдің ақсақалдары мен ардагерлері де өз лебіздерін білдірді. Облыстық ардагерлер кеңесінің төрағасы Еркімбек Солтыбаев ақ батасын берсе, Бекболат Орынбеков пен сала ардагері Берік Нұралиев бұлақ тазалаудың тәрбиелік мәніне тоқталды. Осы орайда Ербол Қарашөкеев:
«Қазақта «Бұлақ көрсең, көзін аш» деген дана сөз бар. Өйткені бұлақ – тіршіліктің бастауы, өмірдің нәрі. Оның мөлдір суы – табиғаттың бізге тарту еткен ең асыл сыйы. Сондықтан бұлақтың көзін ашып, айналасын ретке келтіру – әрбір азаматтың ортақ парызы. «Таза Қазақстан» бастамасы ел өміріндегі маңызды қағидаттардың біріне айналып отыр. Мемлекет басшысы айтқандай, тазалық – әр адамнан, әр үйден, әр көше мен әр қаладан басталуы тиіс. Себебі бұл – бір күндік шара емес, бұл – біздің өмір салтымыз. Осы игі іске үлес қосып жүрген барша азаматқа шынайы алғысымды білдіремін!» — деп атап өтті.
Айта кетейік, аталған экологиялық акция облыстың барлық аудандарында кең көлемде жалғасын тапты.
