Конституция мен «Тілдер туралы» Заңда көрсетілгендей, мемлекеттік тілді білу әрбір азаматтың борышы. Тілдің негізгі қызметі — халықты біріктіру. Демек, мемлекеттік тілдің мемлекеттік басқару орындарында негізгі тіл ретінде қолданылуын қалыптастырған жөн. Қызметке аларда мемлекеттік тілде ойлайтын, сөйлейтін, терең қазақтың болмысын ұғатын қарымды да, қабілетті жастарды алып, іс қағаздарын мемлекеттік тілде жазуға баулу шарт.
Тарихы терең «Қазақстан» атты ортақ шаңырақтың астында 130-дан астам ұлт өкілі мекен етеді. Соның ішінде Жамбыл облысында этнос өкілдері біршамасы шоғырланған. 75-тен астам өзге ұлт өкілдері тұрады. Аумағы үлкен өлкеде ұлттар достығы жанданған. Өйткені, тіл — достықтың алтын көпірі.
Ахмет Байтұрсынұлының бір өлең шумақтарында,
Адамдық диқаншысы – қырға шықтым,
Көлі жоқ, көгалы жоқ құрға шықтым.
Тұқымын адамдықтың шаштым, ектім,
Көңілін көтеруге құл халықтың.
Бұл өлең жолдары арқылы тұлғаның өмірге келгендегі миссиясы қандай болғанын аңғаруға болады. Ол ұлттың тілін сақтап қалу үшін күресті, сол жолда құрбан болды. Оның өмірі мен шығармаларын келешек ұрпаққа насихаттау және жастардың санасына сіңіру руханиятымыз үшін әрқашан да өзекті болары сөзсіз. Мемлекет басшысы Қасым-Жомарт Тоқаев ұлтымыздың ұлы тұлғаларына арналған ескерткіштің ашылу рәсімінде «Ахмет – халқымызды білім мен ғылымға жетелеп, рухани ұстаз болған әйгілі ағартушы» деп айтқан болатын.
«Жеті жұрттың тілін біл, жеті түрлі білім біл» бүгінгі заманға қаратылып айтылған асыл сөз, түптеп келгенде елдер арасындағы ынтымақтың негізгі кілті «тіл» деген байламға әкеледі. Бір сөзбен айтқанда тіл — ұлттың жаны, рухы мен намысы.
Ел президенті Қасым-Жомарт Тоқаевтың өзі де тілдің бүкіл халықты біріктіретін құндылық екенін әр сөзінде еске салады. Сондықтан этнос өкілдері арасындағы мемлекеттік тілдің мәртебесі жоғары. Қазіргі таңда мемлекеттік тілді меңгеруге деген өзге ұлт өкілдерінің қызығушылығы артқан.
Расында, елімізде «Қазақстан Республикасындағы тіл саясатын іске асырудың 2020-2025 жылдарға арналған мемлекеттік бағдарламасы» бекітілген, бас құжатты қабылдаудағы басты мақсат — мемлекеттік тілдің қолдану аясын кеңейту. Аталмыш бағдарламаның іске асырылуы ел аумағында қарқын алған. Облыстық ішкі саясат басқармасына қарасты «Қоғамдық келісім және даму орталығы» КММ -нің ұйытқы болуымен өзге ұлт өкілдерінің қазақ тілін меңгеруіне жағдай жасалуда. Қазақстан халқы Ассамблесянының жұмысын жандандыруға негізделген мекемеде тіл үйрену үйірмесі бар. «Қоғам, кел – қазақ тілі» деп аталатын курста адам білім алады. «Бастауыш», яғни қарапайым деңгейлік және қалған екеуі «Жалғастырушы» базалық деңгей болып бөлінген. «Тіліміздің қолдану аясын кеңейте түсу мемлекеттік саясаттың басты бағыты болып қала береді. Бұл – біз үшін мызғымас ұстаным. Елімізде қазақ тіліне деген сұраныс жыл өткен сайын артып келеді. Қазақ тілі бизнестің, ғылым мен техниканың тіліне айнала бастады» — деген еді мемлекет басшысы Қасым-Жомарт Тоқаев.
Тараз қаласының әкімшілік құқық бұзушылықтар жөніндегі мамандандырылған соты әкімшісінің жетекші маманы Г. Шегебаева
