Бұл туралы Қазақстан Республикасы Еңбек және халықты әлеуметтік қорғау министрлігінің баспасөз қызметі ресми хабаралама жасады.
Жастар практикасына жасы 35-тен аспаған, білім беру ұйымдарын бітірген жұмыссыз түлектер қатыса алады. Бағдарлама түлектерге өз мамандығы бойынша бастапқы жұмыс тәжірибесін жинақтауға мүмкіндік береді.
Бағдарламаға қатысу үшін Мансап орталығына өтініш беру қажет.
Практика кезеңінде әрбір қатысушыға жұмыс беруші тарапынан тәлімгер бекітіледі. Тәлімгер қатысушының кәсіби білімін арттыруға және практикалық дағдыларын дамытуға көмектеседі.
«Жастар практикасын» қаржыландыруды Еңбек ұтқырлығы орталығы «Азаматтарға арналған үкімет» мемлекеттік корпорациясы арқылы жүзеге асырады. Қатысушылардың жалақысы ай сайын төленеді. Төлем жұмыс беруші ұсынған деректер негізінде қатысушылардың екінші деңгейлі банктердегі ағымдағы (карталық) шоттарына аударылады.
“2026 жылғы ақпан–наурыз айларының қорытындысы бойынша жоба аясында 423 адам жұмыспен қамтылды. Бағдарламаға қатысушылар жұмысқа орналасқан ең сұранысқа ие мамандықтар қатарында мейіргер (124 адам), заңгер (66 адам), шет тілі мұғалімі (57 адам), тәрбиеші (47 адам) және бастауыш сынып мұғалімі (43 адам) бар.Республика бойынша орташа жалақы мөлшері 129,7 мың теңгені құрады”, — деп хабарлады министрліктің баспасөз қызметі.
