Ауылдың орталық көшесінде орналасқан бұл спорт нысаны жасанды төсенішпен жабдықталып, түнгі уақытта да спортпен шұғылдануға мүмкіндік беретін жарық шамдарымен қамтамасыз етілген.
Алаңның ашылуы – ауылдық жерлерде бұқаралық спортты дамытуға бағытталған нақты қадамдардың бірі. Жергілікті тұрғындардың айтуынша, бұл нысан ауыл балалары мен жастары үшін пайдалы әрі қауіпсіз орта қалыптастырып, бос уақытты тиімді өткізуге жол ашып отыр.
– Осындай заманауи үлгіде футбол алаңшасы салынғанына өте қуаныштымыз. Жастар бос уақытын тиімді пайдаланып, спортпен жиі шұғылданатын болды. Жалпы, ауылымызда халыққа пайдасы тиетін әлеуметтік нысандар көптеп салынуда. Біз өте қуаныштымыз! – деді ауыл тұрғыны Пернебек Бердімбетов.
Футбол алаңының құрылысын «Сити құрылыс» ЖШС жүргізген.
Ашылу салтанатына орай ауыл жастары арасында кіші футболдан турнир ұйымдастырылып, жеңімпаз командаларға сыйлықтар табыс етілді.
Айта кетейік, Жуалы ауданында бүгінгі таңда 162 спорт нысаны бар. Оның ішінде 1 стадион, 2 спорт кешені, 12 футбол алаңы, 101 спорт алаңшасы және 46 спорт залы жұмыс істейді.
Қазіргі таңда дене шынықтыру және спортпен жүйелі түрде шұғылданушылардың үлесі 41,6 пайызды құрап отыр.
Жамбыл облысының әкімдігі
