Қаламыздың көркі мен санитарлық тазалығын қамтамасыз ету – тек мемлекеттік органдардың ғана емес, әрбір азаматтың қасиетті борышы мен ортақ жауапкершілігі. Соңғы жылдары Тараз шаһарында тұрғындар үшін қолайлы әрі жайлы өмір сүру ортасын қалыптастыру, қоғамдық орындардың санитарлық жай-күйін түбегейлі жақсарту және жасыл желек алқаптарын еселеп көбейту бағытындағы ауқымды жұмыстар жүйелі түрде жүргізіліп келеді. Бұл ретте қала аумағындағы тәртіпті күшейту және инфрақұрылымды халықаралық стандарттарға сай ұстау басым міндеттердің қатарында тұр.
Мемлекеттік деңгейде қабылданған жаңа нормативтік-құқықтық актілер бұл бағыттағы жұмыстардың құқықтық негізін нығайта түсті. Атап айтқанда, 2026 жылғы 1 шілдеден бастап Қазақстан Республикасы Өнеркәсіп және құрылыс министрінің 2026 жылғы 3 маусымдағы №282 бұйрығымен бекітілген «Қалалар мен елді мекендердің аумақтарын абаттандырудың үлгілік қағидалары» толық көлемде қолданысқа енгізілді. Аталған жаңа талаптар жеке және заңды тұлғаларға, сондай-ақ көппәтерлі тұрғын үйлердің аулалары мен қоғамдық аумақтарды күтіп ұстауға тікелей жауапты тұлғаларға айқын міндеттер жүктейді.
Үлгілік қағидалардың талаптарына сәйкес, әрбір меншік иесі немесе кәсіпкер өз нысанына іргелес жатқан аумақтың тазалығын қатаң сақтауға, арамшөптерді уақтылы шауып, жоюға, жасыл желектерді күтіп-баптауға және жалпы аумақты ұқыпты ретке келтіруге міндетті. Заңнамада белгіленген нормати1р бойынша іргелес аумақ ғимаратқа, құрылысқа немесе жеке қоршауға тікелей жанасатын, периметрі бойынша кемінде бес метрлік шектегі аймақты қамтиды. Сонымен қатар қала экологиясын қорғау мақсатында тұрмыстық немесе өндірістік қоқысты белгіленбеген бейберекет орындарға тастауға, құрылыс қалдықтарын кәдімгі тұрмыстық қалдықтарға арналған контейнерлерге тастауға және кез келген қоғамдық аумақтарды ластауға қатаң тыйым салынады.
Осы қағидалардың мүлтіксіз орындалуын қамтамасыз ету және тұрғындардың құқықтық сауаттылығын арттыру мақсатында Жібек жолы ауданы әкімінің бас инспекторлары мен учаскелік полиция инспекторлары бірлесіп, халық арасында кең ауқымды түсіндіру жұмыстарын жүргізіп, абаттандыру нормаларының сақталуына күнделікті қатаң бақылау жасауда. Атқарылған жұмыстардың нәтижесінде, тек қыркүйек айының өзінде абаттандыру қағидаларын бұзған 145 тұрғынға ресми ескерту жасалған болатын. Қуантарлығы, аталған азаматтардың басым бөлігі заң талаптарына түсіністікпен қарап, көрсетілген кемшіліктерді қысқа мерзімде жойды және өз аумақтарын толықтай ретке келтірді. Нәтижесінде жиналған күл-қоқыстар арнайы белгіленген орындарға шығарылып, құрылыс материалдары тиісті орындарға көшірілді.
Дегенмен, заң талаптарын саналы түрде елемейтіндер де кездеседі. Мәселен, аудан әкімінің бас инспекторлары Қазақстан Республикасының Әкімшілік құқықбұзушылық туралы кодексінің 505-бабы аясында 6 азаматқа қатаң ескерту берді. Аталған бап қалалар мен елді мекендердің аумақтарын абаттандыру қағидаларын, сондай-ақ қаланың инфрақұрылымын бұзғаны үшін әкімшілік жауапкершілікті көздейді. Құқықбұзушылықтың сипаты мен заңда белгіленген тәртіпке қарай ескерту немесе айыппұл түріндегі қатаң шаралар қолданылуы мүмкін.
– Қағида талаптарын қатаң сақтау және анықталған кемшіліктерді дер кезінде жою – әрбір тұрғын мен кәсіпкердің басты міндеті, – дейді Жібек жолы ауданы әкімінің орынбасары Диас Әжіман.
Аудан аумағын таза әрі ұқыпты ұстау бағытындағы жұмыстар тек тексерістермен шектелмей, дәстүрлі сенбіліктер арқылы да қарқынды жалғасын табуда. Ұйымдастырылған ауқымды тазалық шараларына әртүрлі мекемелер мен кәсіпкерлер және белсенді тұрғындар атсалысып, жалпы саны 1 300-ге жуық адам қамтылды. Атқарылған жұмыстардың нәтижесінде 300 тоннаға жуық қоқыс шығарылып, көшелер мен қоғамдық орындардың санитарлық-экологиялық жағдайы едәуір жақсарды.
– Республика күні қарсаңында «Таза Қазақстан» жалпыұлттық акциясы аясында «Қызылабад» алабында 2 мың түп тұт ағашы отырғызылды. Бұл игі бастама елді мекеннің жасыл желегін арттыруға, қоршаған ортаны қорғауға және келешек ұрпақ үшін қолайлы экологиялық орта қалыптастыруға тікелей бағытталған. Сонымен қатар «Құмшағал» шағынауданында жаңа балалар ойын алаңшасының ашылуына орай кең көлемді сенбілік ұйымдастырылды. Шара барысында 50 түп терек пен 150 түп қарағаш көшеті егіліп, жасыл желекке айналды. Тұрғындардың белсенді қатысуымен өткен бұл игі шара шағынауданымыздың көркеюіне тың серпін беріп, балалардың қауіпсіз әрі жайлы ортада демалуына қолайлы жағдай жасауға өз үлесін қосты, – дейді Жібек жолы ауданы әкімінің орынбасары Диас Қыдырәліұлы.
Қорыта айтқанда, тазалық пен тәртіпті сақтау тек сенбіліктер кезінде ғана атқарылатын науқан емес, әрбір саналы азаматтың күнделікті өмір салтына айналуға тиіс.
