Зейнет жасына шыққанан кейін жүгірумен айналысып келе жатқан әйгілі марафоншы Жақсылық Мамырбекұлын білмейтін жамбылдықтар бүгінде кемде-кем. 69 жастағы желаяқ қария әлі күнге дейін жеңіл атликадан өтіп келе жатқан әлемдік түрлі жарыстарға қатысып талай жүлделерді еншіліп жүр.
Жақсылық Мамырбекұлы елімізде өткен «Экспо-2017» Халықаралық көрмесінде және Алматы мен Атырау, Ақтау қалалары мен қатар Ресей федерациясының Санкт-Петербург қаласындағы әлемнің түкпір-түкпірінен 62 мемлекеттен 23 000 адам қатысқан марафонда, Ташкент қаласындағы жарыста жүлделі орындардан табылған. 2021 жылы Қырғызстанның Чолпан-ата қаласында 35 мемлекеттен 4800 желаяқ қатысқан Кеңес одағының спорт шебері, Мәскеу олимпиадасының қола жүлдегері, Азия чемпионы Сатымқұл Жұманазаров атындағы марафонда бірінші орынды иеленген.
«Мен Жамбыл облысы, Талас ауданы, Тамды ауылында 1954 жылы дүниеге келгенмін. Осы ауылда туып-сөсіп, мектепті бітіргенмін. Спортты бала кезімнен яғни, мектептегі жастық шағымнан бері жақсы көрдім. Мектептен кейін Алматы қаласындағы Қазақ дене шынықтыру иститутын (қазір академия болып өзгерді) түсіп, 1975 жылы бітіргенмін. 1975-1980 жылдары Қаратаудағы мектепте жұмыс істедім. Одан кейін Жезқазаған облысындағы Ақадыр ауданына оқу бөліміне ауысып сонда 2 жыл жұмыс істеп, теміржол саласына ауысып тепловозшының көмекшісі, одан пойыз машинисі болып 16 жылдай қызмет еттім. 1995 жылы ДЕПО жабылып қалды да, біраз жыл жұмыссыз жүріп туған жерге қайта көшіп келдім. Ауданда да 15 жылдай жұмыссыз жүріп, Таразға келдік. Таразда әртүрлі жұмыстар істеп жүріп, ақыры «Тараз-Жасыл елге» орналасып, мұнда 10 жылдай істеп зейнетке шықтым. Зейнетке шығар алдында да елдегі және әлемдегі әртүрлі марафондардан хабардар болып жүретінмін. Ақыры зейнетке шыққан соң осы марофондарға қатысуға бел байладым. Құдайға шүкір, 2017 жылдан бері жүгіріп Ресей, Өзбекстан, Қырғыстан және өз елімізде өткен көп жарыстарға қатысып талай жүлделерді қанжығам байлап, 24 медалды мойныма тақтым»,- дейді қарт спортшы.
Халықаралық спорттық шараларға қатысып жүргендіктен облыстық спорт басқармасы мен оған қарасты мекемелерден қолдау немесе жергілікті атымтай жомарт азаматтардан қаржылай демушілік болып тұра ма, алдағы уақыттарда қандай жоспарларыңыз бар, қанша жасқа дейін жеңіл атлетикамен айналыспақсыз?,-деген сауалымызға қарт спортшы былай жауап берді:
«Санкт-Петербургтегі марофонға барарыма «Қазфосфат» ЖШС директоры Мұқаш Ескендіров деген азамат қаржылай демеушілік көрсетті. Қырғызстандағы жарыстан жүлделі оралғаннан кейін сол кездегі Талас ауданының әкімі Қанат Мәдібеков: «Аға 70 жасқа дейін екі аяқты атты міне тұрыңыз, қалғанын 70 жасқа толғанда көреміз» деп әлі күнге дейін өзім мініп жүрген велосипедті сыйлады. Бұла заматтарға алғысым шексіз. Ал былтырғы жылы облыстағы ақажағалы азаматтарға біраз ренжігенім бар. 2022 жылы ұлт ұстазы Ахмет Байтұрсынұлының 150 жылдық мерейтойына орай жүгірем деп Аманат партиясының Жамбыл облыстық филиалының атқарушы хатшысы Дауыл Ынтықбаев пен Тараз қалалық әкімінің есігін тоздырғаным бар. Олар да әне-міне деп құр шығарып салып жүргенде күзде келіп, «сыныққа сылтау» дегендей ақыры күн суытып кетті, анау-ынау деп мені шығарып салды. Сөйтіп ойымдағы мақсатым жүзеге аспай қалғаны бар. Енді биыл Төле би бабамыздың 360 жылдығына орай үлкен марафон өткізсем деймін. Тараздан шығып, Жанатасқа барып қайтсам 300 шақырымды қамтиды екенмін. Осы шараны жүзеге асыру мақсатында енді Жамбыл облысы әкімдігінің ішкі саясат басқармасына барып жобамды жеткізсем бе деймін. Кім біледі бәлкім облыстағы басшылар ескеріп, жастарға үлгі болатын игі спорттық дүниеге қолдау көрсетіп қалар деген ойдамын. Ал жаңағы сіздің неше жасқа дейін жүгіресіз деген сауалыңызға Алла денсаулық берсе 80 жасқа дейін жүгіре бермекпін»,-дейді Жақсылық Мамырбекұлы.
Автор: Мадияр ЕРАЛЫҰЛЫ
Қазақстан журналистер одағының мүшесі
