Тараз қаласы әкімінің орынбасары Жандос Өмірзақов Б.Момышұлы атындағы «Жеңіс» саябағының жаңғырту жұмыстарының жүргізілуіне байланысты тұрғындармен кездесті.
Бүгінде аталған саябақта жаңғырту жұмыстары басталып кетті. Осы мәселеге байланысты шаһар басшысының орынбасары Ж.Өмірзақов сондағы «Жайлау» мөлтек ауданының тұрғындарымен кездесіп, алдағы уақытта атқарылатын жұмыстардың барысымен таныстырды. Қала әкімінің сөзінше, шаһардың орталығында орналасқан Б.Момышұлы және Ауған соғысы ардагерлеріне арналған ескерткіштері осы саябаққа әкелінбек. Сондай-ақ Былғары комбинаты аумағындағы «мәңгілік алау да» осында орналасатын болады. Бұдан өзге Б.Момышұлы және соғыс ардагерлеріне арналған музей бой көтермек. Аталған саябақта ҰОС қатысқан 68 мың жауынгердің есімдері мәрмәр тасына қашалып жазылмақ екен. Бүгінде олардың есімдерін анықтау жұмыстары жүргізіліп жатқан көрінеді. Сонымен қатар саябақ маңында орналасқан «Қарасу» каналының жағасы көгерштендіріліп, тұрғындардың демалуына қолайлы жағдай жасалынады. Тағы бір айта кететін жайт, саябақтың басты кіре берісі орналасқан І.Жансүгіров көшесіне тағы бір жолақ қосылып, кеңейтілмек. Қазіргі таңда бұл жұмыстар басталып та кетті. Ал осындай ілкімді істерге облыстық бюджеттен 370 млн теңге бөлініп қойған. Жамбылдықтар алдағы 9 мамыр мерекесін осы саябақта атап өтпек. Ол үшін аталған жұмыстарға жауапты ретінде танылған «Жасыл Ел Тараз» мекемесі жұмыс қарқынын күшейтпек.
TURANINFO.KZ