Гвардейск гарнизонында Тәуелсіздігіміздің 30 жылдығы қарсаңында тәжік-ауған шекарасында қаза тапқан жауынгерлерді еске алу мемориалдық ескерткіштің ашылу салтанаты өтті.
Салтанатты шара Армия генералы, Кеңес Одағының батыры, Қазақстан Республикасының тұңғыш Қорғаныс министрі, «Халық қаһарманы» Сағадат Нұрмағанбетовтың ескерткішіне гүл шоқтарын қоюмен басталды.
Шара барысында еліміздің әнұраны орындалып, тәжік-ауған шекарасында қаза тапқан жауынгерлерге арналған мемориалдық ескерткішке гүл шоқтары қойылды.
Сонымен қатар тәжік-ауған шекарасында қаза тапқан жауынгерлерді бір минут үнсіз еске алды. Мемориалдық кешен жауынгерлік бауырластықтың, ұрыстағы ерлік пен батылдықтың біртұтас күшін бейнелейді.
Ескерткіштің ашылуына Қазақстан Республикасының Парламент Мәжілісінің депутаты Бақытбек Смағұл, «Оңтүстік» өңірлік қолбасшылығы әскерлерінің қолбасшысы генерал-майор Қайдар Қарақұлов, тәжік-ауған шекарасындағы ұрыс қимылдарының ардагерлері мен «Қаһарман ұрпақ» қоғамдық қорының ардагерлері, Жамбыл облысы Қордай ауданы әкімінің орынбасары Дамира Сүгірбай және тағы басқа лауазымды тұлғалар қатысты.
1993 жылдан 2001 жылға дейінгі кезеңде қазақстандық жауынгерлер тәжік-ауған жерінде мемлекеттік шекараны күзету және қорғау жолында жауынгерлік міндетті орындады. Осы жылдар ішінде тоғыз жарым мыңнан астам әскери қызметші қатысты. Олардың төрт мыңға жуығы Қазақстан Республикасы Қорғаныс министрлігінің Құрлық әскерлерінің әскери қызметшілері болды. Барлық жеке құрамның 42 пайызын Қазақстандық жеке атқыштар құрама батальоны құрады. Бұл бөлімше елге оралған соң Отар және Сарыөзек гарнизондарына бөлінді.
– Гвардейск гарнизонында Тәуелсіздігіміздің 30 жылдығы қарсаңында тәжік-ауған шекарасында қаза тапқан жауынгерлерге арналған ескерткіш бой түзеп отыр. Бұл шын мәнінде жас ұрпағымызды отансүйгіштікке баулуға тәрбиелейді, – деді Қазақстан Республикасы Парламент Мәжілісінің депутаты Бақытбек Смағұл.
Сонымен қатар, шараға қатысқан бірнеше лауазымды тұлғалар төсбелгілермен, алғыс хаттармен және грамоталармен марапатталды. Іс-шара соңында ардагерлер мен қонақтар концерттік қойылымды тамашалады.
Жомарт Тажиханов
Гвардейск гарнизонының баспасөз қызметі
