Мемлекет басшысы Қасым-Жомарт Тоқаевтың бастамасымен БҰҰ 2026 жылды тұрақты даму мақсатында Халықаралық волонтерлер жылы деп жариялаған болатын.
Осы атаулы жыл шеңберінде ерекше аталған Азамат Намелбек «Темірқазық» ұйымында қатардағы қатысушыдан жетекшіге дейін көтеріліп, пандемия кезеңінде азық-түлік пен дәрі-дәрмек жеткізуді ұйымдастырған, сондай-ақ бірнеше қалада төтенше жағдай кезінде көмекті үйлестіруге және Түркия мен Сирияға гуманитарлық жүк жөнелтуге белсене қатысқан.
Қоғамдық қызметі барысында 12-ден астам әлеуметтік жобаның іске асуына ұйытқы болып, мыңдаған жастың қолдау табуына, жүздеген азаматтың жұмысқа орналасуына және грант иегері атануына жол ашқан ол ҚР Президентінің «Халық алғысы» медалімен және «Жыл волонтері – 2022» сыйлығымен марапатталған.
Бүгінде Азамат Жамбыл облысы бойынша Ұлттық волонтерлер желісінің амбассадоры әрі өңірлік Жастар кеңесінің төрағасы қызметін атқарады.
Айта кету керек, қазіргі таңда 13 волонтерлік ұйым мен 160 волонтерлер тобы жұмыс істейтін Жамбыл облысында 10 мыңға жуық волонтер бар және Халықаралық волонтерлер жылы басталғалы бері өңірде 500-ден астам іс-шара ұйымдастырылды.
