Әділдік жолы» Республикалық қоғамдық бірлестігі мен Сыбайлас жемқорлыққа қарсы қызмет атты «Әділдікті талап ет!» ауқымды науқанын бастады. Бұл туралы Turaninfo. kz ақпараттық агенттігі хабарлайды.
Бұл туралы республикалық қоғамдық бірлестіктің Жамбыл облысы бойынша филиал жетекшісі Назима Жұбандықова өткен брифингте хабарлады.
«Бірінші кезеңде автожол саласындағы мәселелерге тоқталып, жолдарды салу, жөндеу және күтіп ұстау барысындағы жемқорлық тәуекелдерін анықтауға назар аударылады. Қазақстанда бұл сала сыннан көз ашпай жатқаны анық. Сапасыз жолдар – жол-көлік апаттарында талай адамдардың қайтыс болып, жарақат алуларының себебі болып табылады. 2021 жылы автожол саласына 500 млрд.тг. шамасында қаржы бөлінген. Сонымен қатар, осы жылы 14 000 жол-көлік апаты тіркеліп, онда 2000-нан аса адам қаза болып, 18 000 адам жарақаттанған. Бұл дегеніміз – 20 000 бұзылған тағдырлар! Жол сапасының бұл жағдайға қатысы бар екенін анық», — деп мәлімдеді Назима Жұбандықова.
Оның айтуынша, биыл 11 мыңнан астам шақырым жолға әртүрлі жөндеу жұмыстары жүргізіледі. Бұған 600 миллиард теңгеден астам қаржы бөлінді. Ал, жол жөндеуге бөлінген қаражаттың 44 пайызына мемлекеттік сатып алу қорытындысы жасалған жоқ. Автожолдарды салу жобаларының барлық кезеңдері жемқорлық тәуекелдеріне бейім. Тек мемлекет пен азаматтардың бірлескен күшімен ғана, қоғамды барынша жемқорлыққа қарсы күресте жұмылдыра отыра, бұл зұлымдыққа төтеп беруге болады.
Брифинг барысында бюджет қаражатын тиімсіз пайдаланудың салдары мен тиісті бақылаудың жоқтығы да айтылған.
«Мәселен, Дүниежүзілік экономикалық форумның 2019 жылғы Жаһандық бәсекеге қабілеттілік рейтингіне сәйкес Қазақстан жол сапасының көрсеткіші бойынша әлемнің 141 елінің ішінде 93-ші орынға ие. Төмен көрсеткіштердің себептерінің бірі автожолдарды салу мен жөндеудің барлық кезеңдерінде сыбайлас жемқорлық тәуекелдері орын алатыны болып табылады. Өкінішке орай, ағымдағы жылы осы салада сыбайлас жемқорлық құқық бұзушылықтардың өсуі байқалады. Мәселен, егер 2021 жылы Антикор өндірісінде 18 сотқа дейінгі тергеу болса, биылғы жылдың бірінші жартыжылдығында ғана 15 сыбайлас жемқорлық қылмысы тіркелген. Олардың көпшілігі ұрлау, лауазымды асыра пайдалану және жемқорлықпен байланысты-деді өз сөзінде Департаменттің Превенция басқармасының басшысы Дәурен Омаров.
Спикердің айтуынша, бұл мәселе ҚР Сыбайлас жемқорлыққа қарсы іс-қимыл Агенттігінің сыбайлас жемқорлық тәуекелдер картасына енгізілген.
Азаматтар науқанға Adildik.kz веб-сайты арқылы қосылып, 1463 Call center бойынша Қазақстан автожолдарын салу, жөндеу және күтіп ұстау саласындағы жемқорлық туралы ақпаратты 15 тамыздан бастап хабарлай алады. Науқанға белсенді қатысқан азаматтар «Әділдік жауынгері» мәртебесіне ие болады.
