Жамбыл облысының аумағында жол-көлік оқиғаларының санын азайту, сондай-ақ жол қозғалысы ережелерін бұзушылықтарының алдын алу мақсатында мас жүргізушілерді анықтау бойынша тексеру жұмыстары тұрақты түрде жүргізіліп келеді.
Мәселен, ағымдағы жылдың 20 қаңтарында сағат 00:40 шамасында Қаратау қаласының орталық көшелерінің бірінде патрульдік полиция қызметкерлері жол қозғалысы ережелерін бұзғаны үшін 34 жастағы жергілікті тұрғынның басқаруындағы «BMW 750» автокөлігін тоқтатты. Көлік ішіндегі жүргізуші мен жолаушыдан ішімдіктің иісі байқалған.
Медициналық куәландыру қорытындысына сәйкес екеуінің де жеңіл дәреждегі мас күйде болғаны расталды.
Көлік иесі әйел азаматша екені және ол басқаруды жанындағы мас танысына бергені анықталды. Осы құқық бұзушылық үшін 36 жастағы әйел ҚР ӘҚБтК-нің 608-бабы 1-бөлігімен (Жүргізушінің көлік құралын масаң күйдегі адамның басқаруына беруі) жауапқа тартылып, 15 тәулікке әкімшілік қамаққа алынды.
Сонымен қатар, полиция қызметкерлері көлік басқарған 34 жастағы ер адамның 2020 жылдың ақпанында сот шешімімен көлік құралын басқару құқығынан 7 жыл мерзімге айырылғандығын анықтады. Құқық бұзушыға қатысты ҚР ҚК 346-бабының 1-бөлігі (Көлік құралдарын басқару құқығынан айырылған және масаң күйдегі адамның басқаруы) бойынша сотқа дейінгі тергеу амалдары басталды. Автокөлік айып тұрағына қойылды.
Жамбыл облысының Полиция департаменті көлікті масаң күйде басқарған жүргізушілер туралы «102» пультіне қоңырау шалу немесе Инстаграм желісіндегі «zhambyl_police» ресми парақшасының жеке хабарлама бөліміне жазу арқылы ақпарат беруге болатындығын ескертеді. Барлық келіп түскен мәліметтер бойынша полиция қызметкерлері тиісті шараларды қабылдайтын болады.
