Азаматтардың құқықтарын тұрақты негізде қамтамасыз ету мақсатында Бас прокуратураның басшылығымен жеке қабылдау жүргізілуде. Қабылдау кезінде әрбір өтініш беруші мұқият тыңдалып, оған шешімдердің мәні, сондай-ақ шешудің ықтимал құқықтық жолдары түсіндіріледі.
Қадағалау органының қызметкерлері арызданушылардың уәждерін міндетті түрде қылмыстық істерді зерделеп, тексереді. Қажет болған жағдайда уәкілетті органдардан қосымша ақпарат сұралады. Негіздер болған жағдайда кассациялық наразылықтар енгізіледі.
Мысалы, сотталғанның қорғаушысы оның синтетикалық есірткі сатқанымен келіспей, арызданған. Ол өтінішхатында Жамбыл облысының полиция қызметкерлері тарапынан арандатушылық әрекеті орын алғаны туралы уәждер көрсеткен.
Істі зерделей келе, полиция қызметкері бастапқыда сотталғанды синтетикалық есірткіні бірге қолдануға көндіргені, оның сеніміне кіріп, қызметкер синтетикалық заттарды сатып алуға ақша бергені анықталды, кейін ол әріптесімен бірге жедел-іздестіру және жасырын тергеу әрекеттерін (бұдан әрі –ЖТӘ) жүргізіп, сотталғанды психотроп затты сату барысында ұстаған.
Қолжазба сараптамасына сәйкес ЖТӘ туралы бұйрықта тергеушінің қолы жалған екені анықталды.
Заң нормалары анық бұзылуына байланысты Бас Прокурор Жоғарғы Сотқа наразылық енгізді. Қарау қорытындысы бойынша жоғары тұрған сот полицейлердің әрекетін арандатушылық деп танып, сотталғанды ақтап, сот актілерінің күшін жойды.
Бас Прокуратураның баспасөз қызметі
