Жамбылдық дәрігерлер күннің күрт ысып кетуіне байланысты ескертпе жасап, тұрғындарға дабыл қағуда. Ыстық күндердің келуі — сырттағы жоғары температураның әсерінен болатын күн соққысын тудыруы мүмкін. Бұл – денсаулыққа қауіпті.
Соңғы бір аптада ауа-райына байланысты Таразда жедел жәрдем қызметін шақыру жағдайлары жиілеп кеткен.
Жамбыл облыстық жедел медициналық жәрдем станциясының мәліметінше, 24 мамырдан 30 мамырға дейін түскен қоңыраулар саны – 9995, оның ішінде жылу соққысы бойынша — 2 жағдай болған.
30 мамырдан 6 маусымға дейін 10235 қоңырау тіркелсе, оның ішінде 2-і жылу соққысынан болған.
Дәрігерлер ыстық ауа-райында сағат 11.00-ден 16.00-ге дейін тікелей күн сәулесінің астында болмауға кеңес береді. Ашық түсті табиғи матадан жасалған жеңіл киім киіп, бас киімді ұмытпауды ескертеді. Сусыздандыруға тез әкелетін қантты газдалған сусындардан, алкогольден және кофеиннен аулақ болу үшін көбірек су ішу керек. Созылмалы аурулары бар адамдар, балалар, жүкті және қарт адамдар өздерін басқаларға қарағанда көбірек қорғауы керек.
Егер күн соққысының белгілері болса (дене температурасы мен қан қысымының жоғарылауы, бас ауруы, әлсіздік және жүрек айнуы) науқасты дереу салқын бөлмеге апару керек. Мойын, қолтық, алақан және шап аймағында температураны төмендету үшін дымқыл, салқын майлықтарды қолданған жөн. Сондай-ақ, науқасқа су балансын қалпына келтіру үшін әр 2-3 сағат сайын салқын су беру керек. Есін жоғалту және бас айналу жағдайында жедел жәрдем шақыру қажет.
