70 келіге дейінгі салмақ дәрежесінде сынға түскен отандасымыз дүбірлі додада жоғары шеберлік танытып, финалға дейін жетті. Әлемдік біріншілікті ұйымдастырып отырған – World Boxing ұйымы.
Бибарыс Әшірбай жарыстың алғашқы кезеңдерінен бастап сенімді өнер көрсетті. Ол 1/16 финалда аргентиналық Сантьяго Хименез Лоссоны 5:0 есебімен жеңсе, 1/8 финалда австралиялық Люк Насифтен дәл осындай басымдықпен үстем түсті.
Ширек финалда АҚШ өкілі Асанте Ламарды 3:0 есебімен ұтқан жамбылдық боксшы жартылай финалда өзбекстандық Зулфикор Аджамжоновтан 4:1 есебімен басым түсіп, чемпиондық атаққа таласуға мүмкіндік алды.
Осылайша, Бибарыс Әшірбай U19 санатындағы әлем чемпионатының күміс жүлдегері атанып, халықаралық аренада Жамбыл боксының абыройын асқақтатты.
Жас спортшының бұл жетістігі – табанды дайындық пен тынымсыз еңбектің жемісі. Әлемдік додада жүлдеге қол жеткізуі оның алдағы спорттық жолына серпін берері сөзсіз.
Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
