Жамбылда Бас мемлекеттік санитариялық дәрігер «Облыс аумағында карантин мен шектеу шараларын ұзарту туралы» №2 қаулысын бекітті. Covid-19 бен вирустық пневмония ауруының өсуінен «сары» аймақтағы өңіріміз үшін жаңа шектеулер енгізуге тура келген. Қаулы 19 сәуірде сағат 00.00-де күшіне енеді. Бұл туралы бүгін ӨКҚ алаңында Жамбыл облысының санитариялық-эпидемиологиялық бақылау департаменті басшысының орынбасары Бағлан Қыдырбаев айтты.
Аталған қаулыға сәйкес түрлі бағыттағы нысандардың жұмыстарына тиым салынды. Олардың қатарында балалардың ойын-сауық орталықтары бар. Яғни ойын алаңдары мен жабық үй-жайлардағы аттракциондар қызметін қосуға қатаң тиым салынады. Бұдан бөлек көрермендердің қатысуымен спорттық іс-шараларды өткізуге тиым салынған. Бұл қатарға ас беру, банкет залдарын қосуға болады. Қаулыға сәйкес түнгі және ойын клубтарына, караоке, бильярд объектілеріне кісі кіргізуге шектеу қойылған. Ойын-сауық, бұқаралық іс-шаралар, көрмелер, конференциялар, форумдар, отбасылық, естелік іс-шаралар өсткізуге де рұқсат жоқ.
Алдын ала жазылу бойынша медициналық орталықтар, кабинеттер, стоматологияға қатаң дезинфекциялық шараларды қолдану және шектеу шараларын енгізу арқылы жұмыс істеуге рұқсат берілед. Бұл қатарға қоғамдық көліктер кіреді. Қарбалас уақытта автобустар санын көбейтуге де болады. Бірақ барлық есіктерді ашып, отыратын орындар саны бойынша толтыру қажет.
«Уақыт бойынша шектеумен, 9.00-ден 18.00-ге дейін Банктер, ХҚКО, «Қазпочта» АҚ бөлімшелері жұмыс істей алады. Ұжымдық іс-шараларды өткізбейтін діни орындарға рұқсат бар. Қоғамдық тамақтану объектілері 50%-ға дейін адам толтыра алады. Бірақ 50 орыннан асырмай сағат 7-ден 24-ке дейін жұмыс істеуіне рұқсат. Бұл талап жасы 18 және одан үлкен жастағы адамдар ғана жіберілетін компьютерлік клубтарға да қатысты. Боулинг орталықтар да осы талапқа бағынуы тиіс. Нысандардың барлығына қатысты айта кетейін, «Ashyq» пилотына қатысатын кәсіпкерлік субъектілеріне ғана жұмыс істеуге рұқсат беріледі.» деді, Бағлан Қыдырбаев.
Қатаң дезинфекциялық шараларды қолдану арқылы шектеусіз жұмыс істеуге рұқсат берілген нысандар да бар. Олар байланыссыз қызметтер, туристік компаниялар, бизнес орталықтары, медициналық ұйымдар. Сонымен қатар дәріханалар, азық-түлік дүкендері, шағын маркеттер, сұлулық орталықтары (жазылу бойынша), супермаркеттер, гипермаркеттер, ашық және жабық базарларға, жеке тұрған азық-түлік емес дүкендер, моншалар бар.
