Жамбыл облысының Полиция департаментінің мәліметінше, жыл басынан бері өңірде республикалық «STOP-трафик» жедел-профилактикалық іс-шарасының бір кезеңі ұйымдастырылып, нәтижесінде 6 құқық бұзушылық анықталды.
Жыныстық қанауға ұшыраған адамдарды анықтау мақсатында облыстағы сауналар мен моншаларда рейдтер өткізілді. Нәтижесінде түрлі санат бойынша 16 адам жаңадан профилактикалық есепке алынды. Оның ішінде 14 адам «Жезөкше» санаты бойынша, сондай-ақ бір адам «жеңгетай» және бір адам дәстүрлі емес бағыттағы тұлға ретінде есепке қойылды.
Еңбектік қанау деректерінің алдын алу мақсатында Полиция департаменті, облыстық прокуратура, еңбек инспекциясы және «Жандану» қоғамдық бірлестігінің өкілдерінен құралған мобильді топтар өңірдегі шаруа қожалықтары мен фермерлік алқаптарды аралады.
Есепті кезеңде облыстың 10 ауданына бірлескен іссапар ұйымдастырылып, ондаған шаруа қожалығы тексерілді. Сонымен қатар жеке кәсіпкерлердің, шаруа қожалықтарының, жауапкершілігі шектеулі серіктестіктер мен акционерлік қоғамдардың қатысуымен 22 жұмыс кездесуі өтті. Онда еңбек қатынастарының заң талаптарына сәйкестігі және адам саудасының алдын алу мәселелері талқыланды.
Заңсыз әрекеттердің жолын кесу үшін интернет кеңістігі де тұрақты бақылауға алынды. Instagram, Facebook, Telegram, VKontakte, WhatsApp, «Қыздар.нет» және өзге де интернет-ресурстарға жүргізілген мониторинг барысында адам ағзаларын заңсыз сату, жаңа туған нәрестелер саудасы мен интимдік қызмет көрсетуге қатысты 3474 интернет-ресурс бұғатталды.
Профилактикалық жұмыстар да қатар жүргізілуде. Мемлекеттік органдар мен үкіметтік емес ұйымдардың қатысуымен «Адам саудасына қарсы күрес» тақырыбында кең көлемді ақпараттық акциялар ұйымдастырылып, тұрғындарға 1600-ге жуық ақпараттық жадынама таратылды.
Бұдан бөлек, халық көп шоғырланатын қоғамдық орындардағы LED экрандарда «Адам саудасына қарсымыз»тақырыбындағы әлеуметтік материалдар көрсетіліп, азаматтарға арналған 116-16 сенім телефонының байланыс нөмірі орналастырылды.
Балаларға арналған Бірыңғай «111» Call-орталығы да жұмысын жалғастырып келеді. Бұл байланыс арнасы арқылы психологиялық көмек пен кеңес беріледі. Полиция департаментінің мәліметінше, есепті кезеңде еңбек немесе жыныстық қанауға қатысты хабарламалар тіркелмеген.
Мамандардың айтуынша, адам саудасының алдын алу тек құқық қорғау органдарының жұмысына ғана емес, қоғамның қырағылығы мен тұрғындардың құқықтық сауаттылығына да тікелей байланысты. Осыған байланысты өңірде рейдтік іс-шаралар, интернет мониторингі және ақпараттық-түсіндіру жұмыстары алдағы уақытта да жалғасады.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
