Сот сараптамасының қорытындысы бойынша, 210 материал бойынша сотталғандардың өтінішхаттары қанағаттандырылып, 47,7 пайыз жағдайда олар мерзімінен бұрын бостандыққа шықты. Өткен жылдың ұқсас кезеңінде қанағаттандырылған өтініштер үлесі 48,5 пайызды құраған болатын. Ал 230 материал немесе 52,3 пайыз жағдайда сотталғандардың өтініштері қанағаттандырусыз қалдырылды.
Жазасын өтеушілердің өтінішхаттары бойынша шығарылған сот актілерінің заңдылығы апелляциялық сатыда да мұқият тексерілді. Шартты түрде мерзімінен бұрын босату мәселесі бойынша апелляциялық тәртіппен 163 материал қайта қаралған. Нәтижесінде бірінші сатыдағы соттардың 141 қаулысы (86,5%) өзгеріссіз қалдырылып, 22 қаулының (13,5%) күші жойылған. Бұл апелляциялық алқаның бас бостандығынан шартты түрде босату шешімдерін қабылдауда заң талаптарының бұлжымай орындалуын қатаң бақылауда ұстайтынын аңғартады.
ШТМБ-дан бөлек, сотталғандарға тағайындалған жазаны неғұрлым жеңіл жаза түріне ауыстыру тетігі де белсенді қолданылып келеді. Есепті кезеңде осы бағыт бойынша қаралған материалдардың 30,1 пайызы қанағаттандырылған (өткен жылдың ұқсас кезеңінде бұл көрсеткіш 38,7% болған). Жазаны жеңіл түріне ауыстыру бойынша апелляциялық сатыға 218 материал түсіп, оның 204-і (93,6%) өзгеріссіз қалдырылды, ал 14 материал немесе 6,4 пайызы бойынша сот актілері өзгертілді. Бұдан бөлек, аймақ соттары әкімшілік құқық бұзушылықтар бойынша 9 665 істі қарап, оның 1 928-ін заңда көзделген негіздерге байланысты тоқтатқан. Әкімшілік істер бойынша апелляциялық сатыда қаралған 204 істің 76,5 пайызы (156 іс) өзгеріссіз қалдырылып, сот төрелігінің сапасы сақталды.
