Жамбыл облысында учаскелік полиция қызметкерінің және оның
отбасының өмір сүру жағдайлары қарастырылған жаңа учаскелік пункт
салынды, – деп хабарлайды Polisia.kz.
Учаскелік полиция инспекторының стандарты “полиция қадамдық
қолжетімділікте” қағидаты бойынша құрылуы тиіс, бүгінгі күні бұл – құқық
қорғау органдарының басты міндеттерінің бірі, деп атап көрсетті Ішкі істер министрі Ерлан Тұрғымбаев. Министр атап өткендей, учаскелік
инспекторлар халықпен күнделікті тікелей байланыста, азаматтарға оқыс
жағдайда бірінші болып көмекке келіп, қастарынан табылады, оларды
алаңдататын мәселелерді біледі, шешуге тырысады, азаматтардың өмір
сапасын арттыруда басты тұлға саналады. Учаскелік инспекторлар
азаматтардың қауіпсіздігін қамтамасыз ету, қоғамдық тәртіпті сақтау
бойынша белгілі бір аумақтағы қылмысты болдырмау үшін күрделі
жұмыстарды атқарады.
Мәселен, Жамбыл облысының Байзақ ауданы Бурыл ауылдық
округінде жергілікті атқарушы органдардың күш салуымен жаңа учаскелік пункт салынды, онда учаскелік полиция қызметкерінің және оның отбасының өмір сүру жағдайлары қарастырылған. Осындай жаңа форматтағы пункт Жамбыл облысының аумағында әзірге біреу, алайда, облыстың ПД басшылығы осы үрдісті жалғастыруды жоспарлауда. Айта кетерлігі, тұрғын жай қажетті жиһазбен, техникамен, байланыс құралдарымен және бейнебақылау жүйесімен жабдықталған. Бұл азаматтармен қарым-қатынас процесі үнемі бақылауда екенін білдіреді, сондай-ақ сыбайлас жемқорлық әрекеттеріне де тосқауыл болады. “Бұл әкімшілік учаскеге үш жылға қызметке бекітілдім. Жұмыс оңай емес, міндетіме қоғамдық тәртіпті қорғау, бекітілген учаскеде қоғамдық қауіпсіздікті қамтамасыз ету, сондай-ақ жүгінген немесе шағымданған жағдайда халыққа өзге де көмек көрсету кіреді.
Контингент әртүрлі, әрқайсысына жеке көзқарас қажет, айта кету керек, аумақта 12 943 адам тұрады, оның ішінде 72 адам ІІО-да есепте. Қаруды алып жүруге және сақтауға рұқсаты бар 57 азамат бар, олардың ҚР заңнамасын сақтау және орындау шарттарын қадағалау қажет. Қазіргі уақытта аумақта 22 қылмыс дерегі тіркелді, оның 16-сы ашылды, жұмыс жеткілікті. Өткен кезең ішінде ғана тыныштықты бұзудан, ұсақ бұзақылықтан, жалпы пайдалану орындарының ластануынан, тұрмыс саласындағы құқық бұзушылықтардан бастап қылмыстық теріс қылықтарға дейін әртүрлі сипаттағы 130 әкімшілік құқық бұзушылықты анықтадым”, – деп сөзін түйіндеді Байзақ ауданы Бурыл округінің учаскелік инспекторы Айдын Қорғанбаев.
Учаскелік инспектордың жұмысы толық қайтарымды талап етеді, түнгі
уақытта көптеген қиындықтар туындайды, түрлі шақыртулар болады. Сол
себепті де, инспектордың әйелі оның жұмысына үлкен түсіністікпен қарайды.
Жамбыл облысында 355 учаскелік полиция инспекторы жұмыс істейді,
олар азаматтардың тыныштығын күзетіп, құқықтары мен мүдделерін,
сондай-ақ құқыққа қарсы қол сұғушылықтан қорғайды. Олардың арасында өз өмірлерін қатерге тігіп, адамдардың өмірін бірнеше рет құтқарып, қылмысқа қарсы күресте және қылмыстарды ашуда айтарлықтай көмек көрсеткендер де бар. Учаскелік испекторлар қызметінің тиімділігін арттыру және қызмет атқару жағдайларын жақсарту ҚР ІІМ мен Жамбыл облысының Полиция
департаментінің ерекше бақылауында тұр.
