«Мерке» – Жамбыл облысында заңды тұлға мәртебесін алған алғашқы мемлекеттік өңірлік табиғи парк. Ол облыс әкімдігінің қаулысына сәйкес құрылып, жалпы аумағы 83 713 гектарды қамтып отыр. Ерекше қорғалатын аумақтың басты міндеті – Меркі ауданының бірегей таулы экосистемаларын, сирек кездесетін өсімдіктер мен жануарлар әлемін қорғау, ғылыми зерттеулер жүргізу және экологиялық туризмді дамыту. Сонымен қатар бұл аймақ жойылып кету қаупі төнген қар барысының мекендеу орындары мен көші-қон жолдарын қорғауда айрықша мәнге ие.
Жиында атап өтілгендей, табиғат байлығын көздің қарашығындай сақтау және өскелең ұрпақта экологиялық мәдениетті қалыптастыру Мемлекет басшысы Қасым-Жомарт Тоқаевтың «Таза Қазақстан» бастамасының негізгі өзегі болып табылады. Қазірдің өзінде паркте 59 маман еңбек етіп, инфрақұрылым қарқынды дамуда, сондай-ақ жаңа әкімшілік ғимарат өз жұмысын бастады.
Министрлік өкілі Данияр Тұрғамбаев еліміздегі ерекше қорғалатын табиғи аумақтардың жалпы көлемі 31,1 миллион гектарға немесе ел аумағының 11,4 пайызына жеткенін атап өтті. Жаңа статус аумақтың құқықтық қорғалуын күшейтіп, экотуризм арқылы жаңа жұмыс орындарын ашуға және жергілікті кәсіпкерлікті қолдауға мүмкіндік береді.
Облыстық табиғи ресурстар және табиғат пайдалануды реттеу басқармасының мәліметінше, бұл ауқымды жоба 2019 жылдан бері БҰҰ Даму бағдарламасының қолдауымен қолға алынған болатын. Бүгінгі таңда бұл өңірде 100-ден астам өсімдік түрі мен 12 түрлі сирек жануар тіркелген. Атап айтқанда, мұнда 10 қар барысы, 158 арқар және 28 үнді дикобразы мекендейді. Алдағы уақытта штат санын 84 маманға дейін ұлғайту жоспарланып отыр.
Шара барысында облыс орман шаруашылықтарының материалдық-техникалық базасын нығайтуға да баса назар аударылып, 15 «КамАЗ» өрт сөндіру автокөлігі мен 15 трактордың кілті салтанатты түрде табысталды. Бұл заманауи техникалар табиғи аумақтарды өрт қауіпсіздігінен қорғау жұмыстарының тиімділігін едәуір арттырады.
Салтанатты шара аясында экологиялық ағаш отырғызу акциясы өтіп, қонақтар парктің жаңа инфрақұрылымдық нысандарымен танысты және концерттік бағдарлама ұсынылды. «Мерке» табиғи паркінің құрылуы – еліміздің бай табиғи мұрасын келешек ұрпаққа аман-есен жеткізу жолындағы айтарлықтай үлес.
