Жамбыл облысында сыбайлас жемқорлыққа қатысты қылмыстық істер бойынша 560,3 млн теңге залал келтірілді, деп хабарлады өңірлік коммуникациялар қызметінде өткен брифинг барысында ҚР Сыбайлас жемқорлыққа қарсы іс-қимыл агенттігінің облыс бойынша департаменті басшысының бірінші орынбасары Ернар Мақажанов.
— Қазір бұл соманы өндіріп алу шаралары жүргізілуде. Өткен жылы сыбайлас жемқорлықты төмендетуде оң үрдіске қол жеткен болатын, ал биыл тіркелген қылмыстар саны айтарлықтай өсіп отыр, — деді ол.
Департамент сыбайлас жемқорлық тәуекелдерін анықтау үшін сыбайлас жемқорлыққа қарсы мониторинг және сыртқы талдау тетіктерін қолданады. Тәуекелдер ауыл шаруашылығы техникасын тіркеу және елді мекендерді сумен қамтамасыз ету, автокөліктерді бастапқы тіркеу және «Artsport» бағдарламасын жүзеге асыру сынды әртүрлі бағыттар бойынша анықталды.
«Бірыңғай сатып алу терезесі» арқылы күн сайын мемлекеттік сатып алу мониторингі жүргізіледі. Сыбайлас жемқорлыққа қарсы қызметтің ұсыныстарын қарау қорытындысы бойынша жекелеген мемлекеттік органдардың мемлекеттік сатып алу жоспарлары қайта қаралып, 326 миллион теңгеден астам қаражатты үнемдеуге мүмкіндік берді.
— Мәселен, Меркі ауданы әкімдігінің мәдениет және тілдерді дамыту бөлімінің мәдениет үйлері мен клубтарының орталықтандырылған жүйесі 24 миллион теңгеге 2000 бірлік ыдыс сатып алуды жоспарлаған. Сыбайлас жемқорлыққа қарсы іс-қимыл департаментінің ұсынысы негізінде сатып алу жоспары қайта қаралып, 23,9 млн теңге үнемделді. Ал мұндай мысалдар аз емес. Біздің ұсыныстарымыз мемлекеттік сатып алуды жоспарлау кезеңінде оларды жүзеге асырудың салдарын емес, бұзушылықтарды болдырмауға арналған, — деп түйіндеді Сыбайлас жемқорлыққа қарсы қызмет өкілі.
Сыртқы талдау бойынша жүргізілген кешенді жұмыстар да оң нәтиже берген. Есепті кезеңде облыстық көлік инспекциясы, «Тараз» ӘКК, облыс әкімдігінің жолаушылар көлігі және автомобиль жолдары басқармасының қызметі бойынша 46 ұсыныс берілді.
Ұсыныстардың жартысына жуығы ұйымдастыру-басқару жұмыстары төмен деңгейде тұрған көліктік бақылау инспекциясының басшылығына берілді Қазақстан Республикасы Мемлекеттік қызмет істері агенттігінің департаментінің Әдеп жөніндегі кеңес отырысында барлық бағыттар бойынша инспекция жұмысын қарап, анықталған заң бұзушылықтарды жою туралы шешім қабылданды.
Ернар Мақажанов сыбайлас жемқорлықтың алғышарттарын жою бойынша белсенді жұмыстар жүргізілсе де, оның зардаптарымен күрес тоқтап тұрған жоқ деп атап өтті. Осы уақытқа дейін денсаулық сақтау саласында сыбайлас жемқорлық қылмыс жасаған тұлғаларды жұмысқа қабылдау тәжірибесі жойылған жоқ. Сонымен қатар, оқу орындарын басшыларының заңсыз кәсіпкерлікпен айналысатыны да байқалған. Жұмысқа қабылдаудағы пара алу фактілері де толастамай отыр.
– Сыбайлас жемқорлыққа қарсы қызметтің жедел-іздестіру қызметінің басым бағыттары жүйелі сыбайлас жемқорлық қылмыстардың алдын алу, мемлекетке келтірілген зиянды уақтылы және толық көлемде өтеу болып табылады, – деп түйіндеді баяндамашы.
Арайлы Жақсылық
