Сотталғандардың ішінде 374 тұлға немесе жалпы құрамның 44,8 пайызы бас бостандығынан айыру жазасына кесілген. Салыстырмалы түрде алсақ, бұл көрсеткіш республикалық орташа деңгейден (39,8%) 5 пайызға жоғары болып отыр. Өңірде бас бостандығынан айыру жазасын қолдану үлесінің артуы соттардың жазалау саясатын қатаңдатқанын білдірмейді, бұған ең алдымен сотталатын қылмыстардың сипаты мен соңғы уақыттағы заңнамалық өзгерістер тікелей әсер еткен.
Мәселен, онша ауыр емес қылмыстар жасағаны үшін сотталған 53 адамның 23-іне (43,7%) нақты бас бостандығынан айыру жазасы белгіленді. Тереңдетілген статистикалық талдау көрсеткендей, бұл 23 тұлғаның 16-сы көлік қылмыстарын жасағаны үшін сотталғандар болып табылады. Оның ішінде 9 іс бойынша қайғылы оқиға орын алып, жәбірленушілердің өліміне алып келген, ал 7 іс бойынша азаматтардың денсаулығына ауыр зиян келтірілген. Қалған жағдайларда, 1 тұлға Қылмыстық кодекстің бірнеше баптары бойынша (107, 190, 214, 380, 427-баптар) жиынтық түрде, ал 2 тұлға 104-бап (абайсызда қазаға ұшырату) бойынша сотталған. Жолдағы адам өлімі мен ауыр зардаптарға әкелген қылмыстар үшін бас бостандығынан айыру жазасын тағайындау – қоғамдық қауіпсіздікті қамтамасыз етудің амалсыз шарасы.
Орташа ауырлықтағы қылмыстар бойынша да бас бостандығынан айыру жазасын тағайындау көрсеткішінің жоғары екені байқалады. Есепті кезеңде осы санат бойынша 172 тұлға сотталса (өткен жылы – 107 тұлға), оның 81-іне немесе 47,1 пайызына бас бостандығынан айыру жазасы тағайындалған. Бұл санаттағы сотталғандар санының күрт өсуі заңнамадағы реформалармен түсіндіріледі. Атап айтқанда, бұған дейін онша ауыр емес қылмыстарға жатқызылған кейбір баптар (масаң күйде көлік жүргізу, мемлекеттік шекараны заңсыз өту сияқты ҚК-нің 392, 346-баптары) орташа ауырлықтағы қылмыстар санатына ауыстырылды. Есепті кезеңнің өзінде шекарадан заңсыз өту (392-бап) бойынша сотталған 33 адамның 25-іне, ал жол ережесін бұзу (345-баптың 3-бөлігі) бойынша сотталған 10 адамның 9-ына бас бостандығынан айыру жазасы белгіленген.
