Жамбыл облысында жетпіс лауазымды тұлға автомобиль жолдарының
қанағаттанғысыз жағдайда болғаны және жол қозғалысы қауіпсіздігін тиісті
деңгейде қамтамасыз етпегені үшін әкімшілік жауапкершілікке тартылды,
деп хабарлайды Polisia.kz.
Жол қозғалысы қауіпсіздігін қамтамасыз ету мақсатында Жамбыл
облысының Полиция департаменті Әкімшілік полиция басқармасының
қызметкерлері облыстың бес мың километрден астам көлік жолдарын
тексеріп, бес мыңға жуық ақауды анықтады.
– Жол қозғалысы қауіпсіздігін қамтамасыз ету мақсатында облыстың
автомобиль жолдарында 5365 шақырым жол қамтылып, оларға қатысты 787
тексеру жұмыстары жүргізілді. Тексеру барысында облыстың көлік
жолдарында 4867 ақау анықталды, оның ішінде: республикалық маңызы бар
жолдарда- 975 ақау, облыстық маңызы бар жолдарда- 536 ақау, аудандық
маңызы бар жолдарда- 539 және елді мекендердің көше- жол тораптарына
қатысты 2802 кемшілік анықталды, – деп атап көрсетті Жамбыл облысы ПД
бастығының бірінші орынбасары Бақыт Ратаев.
Тексеру нәтижелері бойынша жол мекемелерінің басшыларына 787
ұйғарым беріліп, 705 жауап алынды. Жол мекемелерінің төрт жүзден астам
жауабы- көбіне қаржыландырудың болмауына байланысты орындау
мерзімдерін ұзарту турасында болды. Автомобиль жолдарын жөндеу және
күтіп ұстауда анықталған кемшіліктер бойынша жергілікті атқарушы
органдарға- 87 ақпарат, облыстық және аудандық прокуратура органдарына
26 ақпарат жолданды.
Автомобиль жолдарын қанағаттанғысыз жағдайда ұстағаны және жол
қозғалысы қауіпсіздігін қамтамасыз етпегені үшін 70 лауазымды тұлға:оның
ішінде жолдарда жұмыс жүргізу, жолдарда, темір жол өткелдерінде жол
құрылыстарын жүргізу бойынша талаптарды орындамағаны үшін (ҚР
ӘҚБтК 631-бабының 1-бөлігі) 60 лауазымды тұлға және жолдардың, темір
жол өткелдерінің және басқа да құрылыстардың немесе жол қозғалысын
реттеудің техникалық құралдарының жарамсыздығы үшін (ҚР ӘҚБтК 630-
бабының 1-бөлігі) – 10 жеке тұлға («Қазақавтожол» ЖПБ ЖОФ ЖШС,
«Нұрасыл-Құрылыс және К» ЖШС, «Шу Автожол» ЖШС, «Сарысу
Жолдары» ЖШС басшылары) әкімшілік жауапкершілікке тартылды.