Таразбен шекаралас жатқан Жамбыл ауданының дихандары егін орағына кірісті. Қазір арпа орылып, қамбаларға жеткізілуде.
Аудан әкімдігі ауыл шаруашылығы бөлімінің бас маман-агроном Амангелді Әбдібековтың мәліметіне сүйенсек, биыл 18537 гектарға масақты дәнді дақылдар себілген. Оның 4 562 гектары күздік бидай, 13 975 гектары жаздық арпа. Бүгінде 28 комбайн 3 410 гектарға орақ салса, 33 тасымалдайтын техника қоймаға 2 535 тонна өнімді жеткізіп үлгерді. Оның 404 тоннасы күздік бидайдың, 2 131 тонна жаздық арпаның еншісінде. Әр гектардан орта есеппен 7,5 центнерден өнім алынуда. Аудан бойынша Жамбыл ауылдық округі, Жасөркен, Қаракемер ауылында еңбектің нағыз қызған шағы. Аптап ыстыққа қарамастан шаруалар төккен тердің ризығын жинап, қыс қамына кіріскен.
Дала еңбеккерлері тынымсыз тірліктің бел ортасында. Солардың бірі — Әбілсейіт Добаев. Диханшы 26 гектарға арпа егіп, өнімін жинауға кіріскен. — Былтыр күзде де ,биыл көктемде де жауын-шашын аз түсті. Қарда қалың болған жоқ. Масақты дәнді-дақылдардың бойы биік емес, алайда өнімі баршылық. Оншақты күнде түгел жинап, қамбаға құйып алмақпын, — дейді Ол.
Өңірлік коммуникациялар қызметі
