Салыстырмалы түрде өткен жылдың ұқсас кезеңінде 2 854 материал келіп түсіп, оның 2 848-і қаралған болатын. Сотқа дейінгі тергеу органдарының ең жауапты өтінішхаттарының бірі – қамауға алу түріндегі бұлтартпау шарасын санкциялау мәселесі. Есепті кезеңде бұл бағытта 461 материал қаралып, оның 303-і немесе 65,9 пайызы бойынша қылмыстық қудалау органдарының өтінішхаттары қанағаттандырылды.
Азаматтардың тергеу органдарының заңсыз әрекеттерінен қорғану деңгейін көрсететін басты көрсеткіш – Қылмыстық-процестік кодекстің 106-бабы тәртібімен шағымдарды қарау процесі. Алты айда тергеу судьялары процеске қатысушылардан түскен 108 шағымды қарап, оның 31-ін немесе 29,7 пайызын қанағаттандырған. Бұл көрсеткіш республика бойынша орташа деңгейден (37%) сәл төмен болғанымен, тергеу органдарының жіберген қателіктерін уақытылы түзетуге мүмкіндік берді. Сонымен қатар, облыс соттары 28 тұлғаға қатысты 17 қылмыстық істі прокурорға қайтарған. Бұл істердің басым бөлігі алаяқтық (190-бап) бабы бойынша өтіп, сотқа дейінгі тергеуде кінәсін мойындаған күдіктілердің сот талқылауында өз ұстанымдарын өзгертіп, айыпты мойындаудан бас тартуына байланысты кері қайтарылған.
Сот жүйесін цифрландыру және баламалы бұлтартпау шараларын кеңінен қолдану аясында электрондық бақылау құралдарын (электронды білезіктер) тағайындау тұрақты бақылауға алынған. Есепті кезеңде облыс бойынша барлығы 137 электрондық бақылау құралы қолданылды. Сандық деректерге сүйенсек, электронды білезіктерді тағайындау бойынша Тергеу соты көш бастап тұр – 67 құрал. Аудандық соттар арасында бұл тетік Меркі аудандық сотында (19), Шу аудандық сотында (14), Талас аудандық сотында (12), Қордай аудандық сотында (7) және Сарысу аудандық сотында (6) белсенді қолданылған. Байзақ (5), Жуалы (3), Мойынқұм (2), Жамбыл және Т. Рысқұлов (1-ден) аудандық соттары да бұл заманауи бақылау шарасын практикаға енгізген.
