Жамбыл облысы Жуалы ауданында өсіріліп жатқан қырыққабаттарға сұраныс жоғары. Қазір пісіп-жетілген көкөністерге Жамбыл облысымен қатар, Түркістан, Қызылорда, Ақтөбе, Маңғыстау, Қостанай облыстарынан да тапсырыс түсуде.
Нұрлыкенттік Өтеновтар әулеті диқаншылықпен 15 жылдан бері тұрақты айналысып келеді.
Ерте көктемде үй іргесіндегі 15 соттық жер теліміне қырыққабат, қызанақ, ащы және тәтті бұрыш, баклажан, пияз, болгар бұрышы, тағы басқа көкөністердің көшетін егіп, баптаумен айналысады.
Әулеттің ортаншы ұлы Мұзаффардың айтуынша, жыл сайын 600-700 мыңға дейін көшет дайындап, оны ауыл тұрғындарына, қала берді аудан орталығындағы сауда орындарына апарып сатады.
Бұдан бөлек, ағайындарымен бірігіп Б.Момышұлы ауылының маңынан 10 гектар алқапты жалға алып, оған қырыққабат, қызанақтың бірнеше сұрпын еккен. Пісіп-жетілген көкөністерді облыс орталығындағы сауда орталықтарына өткереді.
— Біз үшін бұл отбасылық кәсіп. Негізінен ауылды жерде мал мен жерден басқа жұмыс жоқ. Бақташы қорасындағы малының амандығын тілесе, біз де еккен егініміз бен бау-бақшалығымыздан мол өнім алуға ниет етіп, ол үшін күндіз-түні жұмыс істейміз, — дейді ол.
Ағайынды Өтеновтар жалға алған алқапқа жылда қырыққабат егеді. Атап айтқанда, «Ринда», «Бухарест», «Заказ» сұрыптары осында жерсіндірілген. Оның ішінде «Ринда» тұқымы қырыққабаттың басқа сұрыптарына қарағанда, ерте өнім береді.
Жер тиісті өңдеуден өткен соң, алқапқа бір ай бұрын қырыққабат көшеттері отырғызылыпты. Оның жанындағы екі гектар алқапқа картоптың «Гала» тұқымы егілген. Қазір алқап басында шөп жұлу, кетпендеу және суару жұмыстары қатар атқарылуда. Аз адаммен көп жұмыстың бітпейтіні белгілі. Жұмысты уақтылы әрі сапалы аяқтау үшін диқандар отбасы Нұрлыкент ауылынан қосымша жұмысшылар жалдайды.
— Қазір алқап басында шөп жұлумен қатар суғару жұмыстары жүріп жатыр. Әрине бұл мол өнім алудың бірден-бір кепілі. Біз осылай таза өнім өндіруге күш салудамыз. Жерге де мейіріммен қарамаса болмайды,-дейді кәсіпкер.
Өңірлік коммуникациялар қызметі
