Жамбыл облысының экономикалық келбеті соңғы жылдары түбегейлі өзгерді. Бұрын негізінен ауыл шаруашылығымен танылған өңір бүгінде өндіріс пен инвестицияның ірі орталықтарының біріне айналып келеді. Соңғы есепті кезеңнің қорытындысы бойынша облыс инвестиция тарту қарқыны жөнінен Қазақстанда бірінші орынға шықты.
Бірінші тоқсанда негізгі капиталға салынған инвестициялар көлемі 71,6 пайызға артып, 218,1 миллиард теңгеге жетті. Ал тікелей шетелдік инвестициялар көлемі 8,5 есеге өсіп, 289 миллион АҚШ долларынан асты.
Бұл көрсеткіштер кездейсоқ пайда болған жоқ. Нәтиженің артында жүйелі жоспар, нақты міндет және бизнеске қолайлы орта қалыптастыруға бағытталған тиімді жұмыс тұр. Өңірдің жетістігі Үкімет отырысында да ерекше аталды.
Бірінші вице-министр Азамат Амриннің айтуынша, ел бойынша негізгі капиталға салынған инвестиция көлемі 3,5 триллион теңгені құраған. Осы бағыттағы ең жоғары өсімді Жамбыл, Түркістан облыстары мен Ұлытау облысы көрсетті.
Өнеркәсіпке басымдық берілген жаңа бағыт
Қазіргі таңда басты назар шикізат өндіруге емес, оны терең өңдеп, дайын өнім шығаруға аударылып отыр. Бұл ұстаным экономиканың құрылымын сапалы өзгертуге мүмкіндік берді.
Өңдеу өнеркәсібіне салынған инвестициялар 2,7 есеге ұлғайды. Соның нәтижесінде республика бойынша осы салаға бағытталған барлық инвестицияның 28 пайызы Жамбыл облысының үлесіне тиді.
Өндірістік әлеуетті күшейтетін ірі жобалар қатарында «Qazaq Soda» ЖШС-нің кальцийлендірілген сода өндіретін зауыты, «ЕвроХим» компаниясының минералды тыңайтқыш шығару кешендері, «Yonggang Central Asia Iron And Steel» металлургиялық зауыты және Fufeng Group компаниясының жүгеріні терең өңдеу кәсіпорны бар.
Жасыл энергетикадағы ірі бастамалар
Климаттық өзгерістер мен көміртек шығарындыларын азайтуға бағытталған жаһандық үрдістер де тиімді пайдаланылып отыр. Табиғи-климаттық ерекшеліктердің арқасында облыс жаңартылатын энергия көздерін дамыту бойынша Қазақстандағы негізгі алаңдардың біріне айналды.
Францияның Total Eren және Біріккен Араб Әмірліктерінің Masdar компанияларымен бірлесіп жүзеге асырылып жатқан жел электр станциялары жобалары миллиардтаған теңге көлеміндегі инвестиция тартуға жол ашты. Бұл халықаралық әріптестікті нығайтып қана қоймай, өңірдің инвестициялық тартымдылығын арттырды.
Инвесторға қолайлы жүйе қалыптасты
Инвестиция көлемінің артуына әкімшілік рәсімдерді жеңілдету де үлкен әсер етті. Кәсіпкерлер үшін «бір терезе» қағидаты енгізіліп, жобаларды сүйемелдеу тетігі толық жаңартылды.
Облыс әкімі Ербол Қарашөкеевтің айтуынша, бизнес-процестер қайта қаралып, аудан әкімдерінің жұмысы инвестиция тарту нәтижесі арқылы бағалануда. Сонымен қатар ірі жобалардың айналасында өндірістік кластерлер құрылып, шағын және орта кәсіпкерлікті дамытуға мүмкіндік жасалуда.
Бұл жұмыста «Zhambyl Invest» дирекциясының фронт-офисі маңызды рөл атқарады. Инвесторларға жобаның алғашқы кезеңінен бастап жер телімін бөлу, инфрақұрылым тарту және өндірісті іске қосуға дейін жан-жақты қолдау көрсетіледі.
Жеке инвестициялардың айрықша өсімі
Экономиканың тұрақтылығын көрсететін негізгі индикаторлардың бірі – жеке капиталдың белсенділігі. Бұл бағыттағы көрсеткіш ерекше жоғары болды.
Жеке инвестициялар көлемі 205,5 пайызға өсіп, 214,3 миллиард теңгені құрады. Бұл кәсіпкерлердің өңір экономикасына сенімінің артқанын және инвестициялық жобалардың тиімділігіне көз жеткізгенін білдіреді.
3,6 триллион теңгенің инвестициялық қоржыны
Қазіргі таңда облыстың инвестициялық қоржынына жалпы құны 3,6 триллион теңгені құрайтын 80-нен астам ірі жоба енгізілген.
Олардың жүзеге асуы нәтижесінде 10 мыңнан астам тұрақты, жоғары жалақы төленетін және заманауи технологияларға негізделген жаңа жұмыс орны ашылады.
Бүгінде Жамбыл облысы индустриялық дамудың жаңа кезеңіне қадам басты. Ауқымды жобалар, халықаралық серіктестік және тиімді басқару жүйесі аймақтың Қазақстан экономикасындағы стратегиялық маңызын одан әрі күшейте түсуде.
