Сотталушы М. 18 қаңтар 2024 жылы Байзақ ауданындағы шаруа қожалықтың бірінде бола тұра, заңсыз жабайы аңдар аулауға қылмыстық ойы туындаған. Өзінің қылмыстық ойын ақырына дейін жеткізу мақсатында Ж.-ның басқаруындағы «Toyota FJ cruzer» маркалы автокөлігін алдап сұрап, құм өңірінен тауып алған 12 калибрлі «МР-18ЕМ-М» маркалы бір ұңғылы аңшы мылтығын оқ-дәрісімен қаруланып, «Бескепе» атты жерде, автокөліктің алдынан шығып қалған «қарақұйрық» жабайы аңын көріп, оның сирек кездесетін, құрып кету қауіпі төнген және заңмен тыйым салынған жануар екенін біле тұра, оны оқ дәрімен атып алу арқылы жойып, өзінің қылмыстық әрекетін ақырына дейін жеткізген. Осыдан кейін, ол атылған қарақұйрық жабайы аңын автокөлігіктің жүк салғышына салып, өзі мал бағып отырған шаруа қожалыққа келген. Сол уақытта, Жамбыл облысы әкімдігінің табиғи ресурстар және табиғат пайдалануды реттеу басқармасының мамандандырылған «Сапсан» жедел қызметі коммуналдық мемлекеттік мекемесінің инспекторлары артынан келіп, соңғының қылмысы әшкерленіп, ұсталған.
Сонымен, М. атыс қаруын пайдалана отырып, жануарлардың сирек кездесетін және құрып кету қаупі төнген түрін, яғни қарақұйрық жануарын жойып, заңсыз аңшылық жасап, өзінің қылмыстық іс әрекетімен мемлекетке 4 430 400 теңге ірі залал келтірген.
Тараптардың позициясы:
Прокурор сотталушы М.-ға 4 жылға бас бостандығын шектеу жазасын тағайындауды сұрады.
Сотталушы М. кінәсін толық мойындады.
Дәлелдемелер бойынша:
Кінә іс бойынша жиналған дәлелдемелермен: жәбірленушінің өкілінің және мамандардың айғақтарымен, мамандар мен сарапшылардың қорытындыларымен, криминалистикалық зерттеу қорытындыларымен және басқа да заттай дәлелдемелермен дәлелденді.
Сот шешімі:
Сот қылмыстық жауаптылық пен жазаны жеңілдететін мән-жайларға оның кінәсін толық мойындап шын ниетпен өкiнуін, қылмыстық құқық бұзушылық салдарынан келтiрiлген мүлiктiк залалды ерікті түрде өтеуін, бұрын сотты болмағанын жатқызған. Ауырлататын мән-жайлар сотпен анықталған жоқ.
Сот үкімімен М. ҚК-нің 337-бабының 4-бөлігінің 2),4)-тармақтарымен кінәлі деп танылып, мінез-құлқын бақылауды тұрғылықты жері бойынша пробация қызметіне жүктей отырып, 7 жыл мерзімге аңшылық қызметпен айналысу құқығынан айыра отырып, 4 жыл мерзімге бас бостандығын шектеу жазасы тағайындалды.
Үкім заңды күшіне енді.
Қайнар: Жамбыл облысының қылмыстық істер жөніндегі мамандандырылған ауданаралық сотының баспасөз қызметі
