Мемлекет басшысының 2020 жылғы 1 қыркүйектегі Қазақстан халқына Жолдауында қылмысқа қарсы күрес саласын жаңғырту, азаматтардың құқықтарын толықтай қорғауды қамтамасыз ету және жоғары халықаралық талаптарға жауап беру туралы баяндалған болатын. Бұл жұмыста құқық қорғау органдары маңызды рөл атқарады.
Арнайы уәкілетті органдардың құқық қорғау қызметі қоғам мен азаматтардың құқықтары мен бостандықтарын қорғауға, мемлекетте құқықтық тәртіпті қамтамасыз етуге бағытталған.
Бұл қызметтің негізгі мақсаттары азаматтардың құқықтары мен бостандықтарын қорғау және қалпына келтіру, құқық бұзушылықпен күресу және олардың алдын алу болып табылады.
Құқық қорғау органдарына сот, арбитражды сот, Конституциялық сот (Қазақстанда – Конституциялық Кеңес), прокуратура, ішкі істер органдары, мемлекеттік қауіпсіздік және сот төрелігі, кедендік бақылау жатады.
Өкінішке орай, қоғамда тәртіп сақшыларына құрмет көрсетпеу, олардың заңды талаптарына бағынбау, балағаттау, тіпті деннсаулықтары мен өмірлеріне қауіп төндіру оқиғалары тіркелген.
Айта кеткен жөн, жоғарыда аталған әрекеттер үшін Қазақстан Республикасы Қылмыстық кодексінің 378, 379, 380 және 380-1-баптары бойынша қылмыстық жауапкершілік көзделген.
Статистикалық мәліметтерге сәйкес, 2022 жылдың алты айында Тараз қаласында аталған баптар бойынша тоғыз тұлғаға қатысты қылмыстық қудалау қозғалып, оның төртеуі кінәлі деп танылып, сотталған.
Мысалы, 2022 жылғы 2 мамырда азамат Е., Тараз қаласы ІІБ инспекторларының наркологиялық диспансерге тексеруден өту және әкімшілік хаттама толтыру туралы заңды талаптарға наразылығын көрсетіп, алкогольдік масаң күйде полиция 1-бөлімінің 2-ші әкімшілік ғимаратында полиция қызметкеріне шат аймағына тепкімен дене жарақатын салған.
Аталған факті бойынша Тараз қаласының №2 полиция бөлімі ҚР Қылмыстық кодексінің 380-бабының 1-бөлігі бойынша сотқа дейінгі тергеу амалдарын бастады. Тергеу қорытындысы бойынша қылмыстық іс сотқа жолданып, оның үкімімен азамат Е.-ға бір жылға бас бостандығынан айыру жазасы тағайындалды.
Құқық қорғау органдарының жұмысы халыққа адал қызмет етуге, қоғамдық қауіпсіздікті, қатаң заңдылық пен тәртіпті қамтамасыз етуге бағытталған.
Тәртіп сақшыларының заңсыз әрекеттері, этикалық жат әрекеттері анықталған жағдайда тиісті органдарға немесе сенім телефондарына хабарласуыңызды сұраймыз.
