Бүгін ҚР «Атамекен» Ұлттық кәсіпкерлер палатасы Төралқа төрағасы Тимур Құлыбаев аймаққа жұмыс сапармен келіп, кәсіпкерлер палатасының Өңірлік кеңес отырысына қатысты. Жиынға облыс әкімі Асқар Мырзахметов, Өңірлік Кәсіпкерлер палатасы мен Өңірлік Кеңестің мүшелері, мемлекеттік органдар мен бизнес өкілдері қатысты. Басқосуда хабарлама жасаған Тимур Құлыбаев «Атамекен» Ұлттық кәсіпкерлер палатасы атқарған жұмыстардың негізгі нәтижелеріне тоқталып, 2013-2017 жылдар аралығында бизнестің құқығын қорғау бағыты бойынша 22 мыңнан астам өтініш түскендігін жеткізді. Оның 40 пайызы оң шешімін тапқан екен. Кәсіпкерлерге тиесілі құны 92 млрд. теңге болатын мүлік қорғалған. Оның ішінде бизнесмендерге салынған айыппұлдар, өсімпұл және мемлекеттің кәсіпкерлерге қайтарған қаржылары. «Атамекен» 20 мыңнан астам нормативтік-құқықтық актілер мен заң жобаларына сараптама жүргізген. ҰКП жасаған ескертулер мен ұсыныстардың 73 пайызы, яғни 6500 жобаны мемлекеттік органдар есепке алған. Мәселен, Ұлттық кәсіпкерлер палатасының тікелей қатысуымен жаңа Салық кодексі әзірленді, шағын және орта бизнес үшін арнайы салық режимдері және ҚҚС шегі сақталып, әкімшілендіру айтарлықтай жеңілдетіліпті.
Ағымдағы жылдың 3 айында Палатының бастамасы мен талдауына сәйкес 6 лауазымды тұлға тәртіптік жауапкершілікке және біреуі әкімшілік жауапкершілікке тартылды. Жер учаскелірінің онлайн ақпаратқа қол жеткізуі мен облыс бойынша инженерлі-коммуникациялық желілерге қосылуына келетін болсақ, оған 2018 жылдың бюджетінен 17 541 809,22 теңге көлемінде қаражат қарастырылған.
Шағын индустриялық аймақ құрып, ондағы орындарды (мекемелерді) барлық коммуникацияларымен шағын және орта бизнеске жалға беру мәселесі де пысықталуда. Облыс бойынша жергілікті үлес мониторингілейтін комиссия жұмыс істейді. 2016-2017 жылдары аталған комиссияның 12 отырысы өтіп, отандық тауарөндірушілермен 20,6 млрд.тг сомасына келісімшарт жасалды. Комиссияның арқасында отандық тауарөндірушілердің мемлекеттік сатып алудағы үлесі артты. Комиссия кеңес берген соманың көрсеткіші 40%-дан асқан.
Кәсіпкерлік саласын дамыту мақсатында «Атамекен» ҰКП «Бастау» жобасын ұсынды. «Нәтижелі жұмыспен қамту және жаппай кәсіпкерлікті дамыту 2017-2021 жылдарға арналған» мемлекеттік бағдарламасының екінші бағыты «Бастау» жобасы арқылы былтыр Қазақстанның 15 ауыл азаматы тегін білім алды. Нәтижесінде, 3 мыңнан астам адам кәсібін ашып, сондай-ақ бар бизнестерін кеңейтті. Бұл жобаға Жамбыл облысының 6 ауданынан 1125 адам қатысып, оның 296-сы жеке ісін ашты. Биыл өңірдің барлық аудандарынан 2347 адам қатысып, оның 469 қатысушысы қаржыландырылады деп күтілуде.
2016 жылдың тамызында ашылған «Атамекен Тараз» МҚҰ 114 кәсіпкердің 502 миллион теңгеге жобаларын қаржыландырып үлгерді. Оның ішінде 43 қатысушы «Бастау» жобасы арқылы несие алғандар. Қазірде 60-тан аса адам тұрақты жұмыспен қамтылды.
Кездесу барысында кәсіпкерлер толғандырған сауалдарын көтеріп, жүйелі түрде шешімін табуы тиіс мәселелерді көтерді.
TURANINFO.KZ
