Жамбыл облысы бойынша қылмыстық-атқару жүйесі департаментінің ұйытқы болуымен Тараз қаласындағы №3 мектеп-лицейінің базасында «Жас сақшы» сыныбы салтанатты түрде ашылды. Бұл жоба өңірдегі білім беру мен әскери-патриоттық тәрбиені ұштастырған маңызды бастамалардың біріне айналып отыр.
Аталған бастаманың басты мақсаты – оқушылардың бойында темірдей тәртіпті, жоғары жауапкершілікті және мемлекеттік мүддеге деген адалдық қасиеттерін ұялату. «Жас сақшы» сыныбының тәрбиеленушілері алдағы уақытта мектеп қабырғасында жүріп-ақ құқық қорғау саласының қыр-сырымен танысып, заң үстемдігін құрметтеудің мән-маңызын терең ұғынатын болады. Салтанатты рәсім барысында сала ардагерлері мен тәжірибелі қызметкерлер сөз сөйлеп, жас буынға ақ баталарын берді және ел қауіпсіздігін күзету – қасиетті борыш екенін ерекше атап өтті.
Шараның ең толқынысты сәті оқушылардың арнайы ант қабылдау рәсімі болды. Жас сақшылар Отанға адал қызмет етуге, өз елінің лайықты азаматы болуға серт беріп, елдік мүдде жолында аянбай еңбек етуге дайын екендіктерін білдірді. Бұл қадам олардың болашақта мамандық таңдауына ғана емес, саналы тұлға ретінде қалыптасуына да оң ықпал етпек. Жамбыл облысы бойынша ҚАЖ департаменті өскелең ұрпаққа дұрыс бағыт-бағдар беретін мұндай тәрбиелік маңызы зор жобаларды алдағы уақытта да жүйелі түрде жалғастыруды жоспарлап отыр.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
