Орталықтың ашылуына облыс әкімі Ербол Қарашөкеев, Қазақстан Республикасының Еңбек және халықты әлеуметтік қорғау вице-министрі Назгүл Сағындықова қатысты деп хабарлайды TURANINFO.KZ ақпарат агенттігі.
Нысанның құрылысы 2021 жылы басталған. Мердігер ұйым «ТаразСтрой — 2004» ЖШС болып табылады. Орталықтың жалпы аумағы — 4,932 гектарды құрайды.
Жамбыл облысы әкімдігі жұмыспен қамтуды үйлестіру және әлеуметтік бағдарламалар басқармасы басшысы Гүлдана Жауынбекованың айтуынша 5 блоктан тұратын нысанда сауықтыру-жүзу бассейні, акт залы, спорт залы, 3 қабатты емдеу корпусы ас блогы, 2 қабатты стационар, І және ІІ топ мүгедектігі бар адамдарға 8 түрлі арнаулы әлеуметтік қызметтер ұсынылады: физио емдеу, электрмен емдеу, инелі рефлексотерапия, озакерит-парафинмен емдеу, ингаляция, емдік шынықтыру, емдік уқалау, галокамера, бассейн, жарықпен емдеу, жеке және топтық сабақтар, патронаж, компьютерлік техникаға баулу, интернетті, әлеуметтік порталды, ЭЦҚ пайдалану, кесте тоқу және бисер, тігін табиғи материалдармен жұмыс жасау, халық қолданбалы өнер, фитотерапия, мүсін шеберханасы, шаштараз, маникюр, педикюр оқыту, кескіндеме, аяқ киім тігу, жөндеу, ағаш күйдіру, музыкаға баулу, театр студиясы, кітапхана, зейнетақы, жәрдемақылар, жеңілдіктер түрлерін алуға көмек ету, заңды тұрғыда кеңестер беру, хат жазу мен жолдауға көмек беру қамтылған.
Әлеуметтік қызмет түрлері қызмет алушының денсаулығына байланысты 43 күннен бастап 6 айға дейінгі мерзімде жартылай стационар жағдайында көрсетіледі. Орталықта жыл сайын 1000 мүгедектігі бар адам оңалтудан өтеді деп жоспарлануда.
