Шараның тізгінін Ринат Нұрақбаев пен Балауса Бисенова жүргізді. Алғашқы құттықтау сөзді сөйлеген этно-орталықтың негізін қалаушы, жеке кәсіпкер Меруерт Лештаева жобаның мән-маңызына тоқталды.
— «Бұл бастама ұрпақтың ұлттық тамырын танып, дәстүр мен мәдениетті тереңірек сезінуіне бағытталған. Сонымен қатар, аталған этно-орталық өңірдегі туризмді дамытуға да өз үлесін қосуды көздейді», — деді Меруерт Лештаева.
Мерекелік бағдарлама барысында әнші Наркенже Серікбаева сахна төрінде өнер көрсетіп, көпшілікке ерекше көңіл күй сыйлады. Қонақтар үшін арнайы тігілген киіз үйлерде ұлттық дастарқан жайылып, наурызкөжеден дәм ұсынылды.
Іс-шара ұлттық спорттық ойындармен жалғасып, аламан айтысқа ұласты. Айтыс алаңында облысқа танымал ақындар – Есет Досалы, Дидар Апбасов, Мұқағали Балтабай, Жанерке Қамбар, Мирас Жамалбек және Әсел Мұратқызы сөз сайыстырды.
Мерекелік жиын марапаттау рәсімімен қорытындыланып, қатысушылар көтеріңкі көңіл күймен тарқасты.
