Кеңес дәуірінде Тараз Кеңес одағы бойынша ең ірі химия өнеркәсібінің орталығы болғандығы ақиқат. Дегенмен Одақ тараған соң бұрынғы жүйенің ыдырауы, экономикалық байланыстардың бұзылуы себебінен қаланың инфрақұрылымдарында бірқатар өзгерістер пайда болып, өндіріс және өнеркәсіп орындарының жұмысында іркілістерге жол берілгендігі баршаға аян. Тәуелсіздік алып, еңсе түзеген қазіргі уақытта қалада экономикалық тұрақтылық орнығып, өрлеу-даму тенденциялары айқын байқалуда. Мәселен, 2000 жылы өнеркәсіп өнімдерін өндірудегі құлдырау-тоқтап даму кезеңі басталды. Мысалы, 1999 жылы қаланың өнеркәсіп орындары барлығы 10,4 млрд. теңгенің өнімін өндірсе, 2016 жылы 161 млрд. 749,8 млн. теңгенің өнімдерін шығарды. Бұдан дегеніміз 2015 жылмен салыстырғанда 22 млрд. 317,4 млн. теңгеге артық өнім өндіргенін байқаймыз. Сондай-ақ келер жылы құны 10,0 млрд. теңгені құрайтын 3 индустриалдық жобаны іске асыру жоспарланып отыр, онда 95 жаңа жұмыс орны ашылмақ. 2002 жылдары қалада 1960 бірлік шағын және орта бизнес кәсіпорындары жұмыс істесе, өткен жылы қалада 31 003 кәсіпкерлік субъектілері тіркелген. Оның ішінде 25693 жеке кәсіпкер, 5380 шағын және 33 орта кәсіпорын субъектілері. Шағын, орта бизнес субъектілерімен өндірілген өнім көлемінің үлесі 14 млрд. 148,0 млн. теңгені құрап, жалпы өнеркәсіп кәсіпорындарымен өндірілген өнімнің 8,7%-ын құрап отыр.
2016 жылдың 1 қарашасындағы есеп бойынша бюджетке 24 млрд. 984,0 млн. теңге салық және басқа да міндетті төлемдер түсіп, жылдық жоспар 122,5%-ға орындалыпты. Өткен жылдың 10 айында бюджеттің шығыс бөлігі трансферттерді қоса есептегенде 34 млрд. 341,0 млн. теңгені құрап, 97,2% игерілген. Азаматтардың мүлкін жария ету бойынша барлығы 2024 арыз тіркеліп, одан 17 млрд. 096,8 млн. теңгені құрайтын 1915 құжат бойынша мүлікті жария етуге оң шешім қабылданған. Сондай-ақ 2016 жылдың қаңтар-қазан айларында 107,6 мың шаршы метр тұрғын үй пайдалануға берілген.
