Табысқа ұмтылған әйел ойда жоқта 6 млн теңгеден айырылды

Өзін инвестициялық компанияның сарапшысы ретінде таныстырған алаяқ Степногорск тұрғынынан шамамен 6 миллион теңге көлемінде ақша алған. Әйел криптовалютаға салым жасаудан пайда көремін деп ойлап, барлық жинағынан айырылды.

Оқиға қалай болған?

Былтыр 9 желтоқсанда Степногорск тұрғыны Instagram желісінде электрон биржада инвестиция жасау туралы жарнаманы көріп, қызығушылық танытады. Жеңіл табысқа кенелу ниетімен әйел байланыс мәліметтерін көрсетілген өтінішке қалдырады. Сол күні WhatsApp мессенджері арқылы белгісіз біреу оған хабарласады. Өзін «басқарушы талдаушы» ретінде таныстырған ер адам 40 минутқа созылған бейнеқоңырау барысында криптовалютамен сауда жасаудың «сенімділігі» мен «тиімділігі» туралы егжей-тегжейлі түсіндіреді.

Алайда бейнеқоңырау кезінде ер адамның бейнесі көрсетілмеген, тек қара экран болған. Келесі күндері алаяқ әйелмен тұрақты байланыста болып, оны біртіндеп несие рәсімдеуге және қаражат аударуға көндіреді.

Әйел оның айтқандарын бұлжытпай орындап, бірнеше несие рәсімдеп, қолындағы жинағын түгелдей белгісіз адамның шотына аударады. Осыдан кейін алаяқ барлық байланысын үзіп, ізін суытқан.

Полиция пікірі

«Зардап шеккен адам бұған дейін осындай алаяқтық схемалар туралы естігенін, бірақ бұл жолы өзін гипнозға түскендей сезінгенін айтады. Қазір соталды тергеу жүргізіліп жатыр. Полиция алаяқтың жеке басын анықтап, оны қолға түсіру мақсатында іздестіру жұмыстарын жалғастырып жатыр», — деп жазылған хабарламада.

Тәртіп сақшылары қазақстандықтарға инвестиция кезінде барынша сақ болуға, интернеттегі күмәнді ұсыныстарға сенбеуге және қаржылық операциялар жасамас бұрын ақпаратты мұқият тексеруге кеңес береді.