Жамбыл облысының қылмыстық істер жөніндегі мамандандырылған ауданаралық сотымен Қылмыстық кодекстің (әрі қарай ҚК) 296-бабының 2,3,4-бөліктері (есірткі,ірі мөлшердегі, аса ірі мөлшердегі есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау), 297-бабының 3-бөлігінің 3)-тармағы (есірткі, психотроптық заттармен, сол тектестермен өткізу мақсатынсыз заңсыз жұмыс істеу, аса ірі мөлшерде есірткі затын өткізу мақсатында заңсыз иемдену, сақтау, тасымалдау) бойынша айыпталушы Н.К.-ға қатысты қылмыстық іс қаралды.
Сотпен не анықталды:
Сотталушы Н.К. Меркі ауданына қарасты ауылдардың бірінде тұратын ағасының үйінен шығып, есірткі затын заңсыз айналымымен байланысты қылмыстық пиғылымен, өзімен бірге қолғап, ағаш илегіш және полиэтилен пакеттерін алып, жалдамалы жүк көлігіне өзінің жылқысын салып, Тәтті ауылына жеткен. Тәтті ауылынан құмды алқапқа өзінің жылқысымен шығып, құмды алқапта аса ірі мөлшердегі есірткі заттарын заңсыз иемдену және дайындау мақсатында, қолғапты қолына киіп, өсіп тұрған есірткі заттарын жинап, сол жерде кептірген, ағашпен илеп, «гашиш» есірткі заттарын дайындаған. Кейіннен, тасымалдауға ыңғайлы болу үшін есірткі заттарын полиэтиленді пакетке жинаған, қылмыстық әрекеттерін жасыру мақсатында арнайы құралдарын өртеп, жойған.
Содан, Н.К. аталған аймақта екі тәулік аралығында аса ірі мөлшердегі есірткі заттарды өткізу мақсатында заңсыз иемденіп және дайындап, түңгі мезгілді пайдаланып, өзінің жылқысымен жолға шығып, ағасының үйіне аса ірі мөлшердегі есірткі заттарды заңсыз тасымалдап алып келіп, дәліз бөлмесіндегі жер төлесіне аса ірі мөлшердегі есірткі заттарды салып, заңсыз сақтап, содан өзінің Тараз қаласындағы мекен-жайына қайтып кеткен.
Осыдан кейін, бірнеше ай өткеннен кейін Н.К. Меркі ауданына қарасты ауылдағы ағасының үйіне келіп, жасырын сақталған «кептірілген марихуана» және «гашиш» есірткі заттарын шамалы мөлшерде полиэтилендік пакеттерге салып, өзінің киіп жүрген киімдерінің қалтасында заңсыз сақтаған.
Меркі ауданы полиция бөлімінің қызметкерлерімен жедел профилактикалық іс-шараларын жүргізу барысында, аталған үйдің алдында Н.К.-ға жеке тінту жүргізіліп, соңғының шалбарының сол қалтасынан, жалпы салмағы – 3,57 грамм «кептірілген марихуана» есірткі заты және үстіндегі киімінің сыртқы оң қалтасынан, жалпы салмағы – 59,56 грамм ірі мөлшердегі «гашиш» есірткі заты табылып алынған.
Ары қарай, үйге тінту жүргізіліп, үйдің ас бөлмесінде шкафтың ішінде тұрған ыдыста және үйдің дәліз бөлмесінің жер төлесінде Н.К.-ның жасырын сақтаған, жалпы салмағы – 5878,48 грамм аса ірі мөлшердегі «гашиш» есірткі заттары табылып алынған. Сонымен қатар, үйдің дәліз бөлмесінің жер төлесінде жасырын сақтаған, жалпы салмағы – 1028,00 грамм аса ірі мөлшердегі «кептірілген марихуана» есірткі заттары табылып алынған.
Тараптардың позициясы:
Прокурор сотталушы Н.К.-ге 11 жыл бас бостандығынан айыру түріндегі жаза тағайындауды сұрады.
Сот отырысында сотталушы Н.К. кінәсін ішінара мойындады.
Дәлелдемелер бойынша:
Кінә іс бойынша жиналған дәлелдемелермен: тергеп-тексеру амалдары жүргізілу барысында толтырылған және басты сот талқылауында зерделенген процессуалдық құжаттармен, іс бойынша сұралған куәлердің жауаптары, сараптамалардың қорытындыларымен, сондай-ақ қылмыстық істің өзге де материалдарымен дәлелденді.
Сот шешімі:
Қылмыстық жауаптылық пен жазасын жеңілдететін мән-жайлар ретінде, сот оның тұрғылықты жері бойынша жақсы мінезделуін, жас баласы барын, тәжік-ауған шекарасындағы әскери іс-шаралардың ардагері болуын, денсаулығы осал екенін табады.
Қылмыстық жауаптылық пен жазасын ауырлататын мән-жайлар сотпен анықталған жоқ.
Сот үкімімен ҚК-нің 296-бабының 3-бөлігімен, 296-бабының 4-бөлігімен және 297-бабының 3-бөлігінің 3)-тармағы бойынша Н.К.-ға орташа қауіпсіздік қылмыстық-атқару жүйесі мекемесінде жазасын өтей отырып, 10 жылға бас бостандығынан айыру жазасы тағайындалды.
Үкім заңды күшіне енген жоқ.
Қайнар: Жамбыл облысының қылмыстық істер жөніндегі мамандандырылған ауданаралық сотының баспасөз қызметі
