Әлеуметтік желілерде Жамбыл облысының Шу ауданындағы Ескі-Шу ауылдық округінің шаруалары суармалы суды қажетті көлемде ала алмай отырғаны туралы ақпарат тарады. Су ресурстары және ирригация министрі Нұржан Нұржігітовтің тапсырмасы бойынша «Қазсушар» РМК-ның жергілікті филиалы округтегі шаруа қожалықтарын сумен қамтамасыз ету жағдайына жедел тексеру жүргізді. Тексеру нәтижесінде әлеуметтік желілерде тараған ақпарат шындыққа сәйкес келмейтіні анықталды. Керісінше, бірқатар шаруа қожалығы «Қазсушардың» Жамбыл филиалымен жасалған су беру келісімшарттарында көрсетілген көлемнен артық су алып отыр. Вегетация кезеңінің соңғы сатысына қарамастан, шаруаларға су жеткізу жалғасып жатыр. Мысалы, диқан Мудасиз Абдиманапов 1,74 га бақша алқабын суару үшін 8,352 мың текше метр суға келісімшарт жасасқан. Бүгінге дейін оған 14,79 мың текше метр су берілді. Бұл келісімшартта көрсетілген көлемнен 6,4 мың текше метрге артық. «Жәнібек» шаруа қожалығының иесі Сембек Байтанаев 4,7 га бақша алқабын суару үшін 22,56 мың текше метр су алуға келісімшарт жасаған. Алайда қазірдің өзінде оған 73,1 мың текше метр су берілді, бұл келісімшарттағы көлемнен 50,54 мың текше метрге артық.
«Бүгін, 25 тамыз күні, біз суымызды кестеге сәйкес алып отырмыз. Осы вегетация кезеңінде егістік алқаптарына соңғы суаруға қажетті су берілді. Қазір жерімізді суарып жатырмыз. Барлығы жақсы. Су шаруашылығы қызметкерлеріне алғыс айтамыз», — деді Ескі-Шу ауылдық округінің диқаны Мудасиз Абдиманапов.
Су ресурстары және ирригация министрлігі
