Жамбыл облысы әкімдігінің қызметкерлері turaninfo.kz сайтының журналисі Исламбек Дастанның үстінен полицияға арыз жазғанын хабарлаған болатын.
Адвокат Әлия Арзымбетованың айтуынша, сот сараптамасы институтының сарапшысы Сәбира Болысбаевадан құжат келді. Онда «Ұсынылған дәлелдемелерді лингвистикалық талдау олардың мазмұнында Е.Үйсімбаевқа және Қуанышев С.С. қатысты ар-намыс пен қадір-қасиетке нұқсан келтіретін мәліметтердің жоқтығын көрсетеді, өйткені мәтіндерде қоғамда қабылданған заңдарды, моральдық қағидаларды сақтау тұрғысынан нысаны бойынша растайтын және бұл тұлғалардың қызметін теріс сипаттайтын мәліметтер жоқ. Сонымен, зерттеуге ұсынылған материалдарда Е.ҮйсІмбаевтың және Қуанышев С.С.ар-намысы мен қадір-қасиетіне нұқсан келтіретіндей дәрежеге келтіретін мәліметтер жоқ» деген құжат келді.
Сарапшы «Зерттеуге ұсынылған И.Дастанның мақаласының мәтіндерінде ҮйсІмбаева Е. пен Қуанышев С. ар-намысына, қадір-қасиетіне нұқсан келтіру санатына жатқызуға болатын ақпарат жоқ» деген қорытындыға келген.
Айта кетерлігі, ағымдағы жылдың сәуір айында Жамбыл облысы әкімінің орынбасары Еркін Үйсімбаев пен ішкі саясат басқарма басшысының орынбасары Сержан Қуанышевтың полиция департаментіне Жамбыл облысы бойынша меншікті тілшінің мақаласына қатысты құқықтық баға беру бойынша арыз түскен болатын.
Журналист өз кезегінде “БАҚ туралы” заңға сәйкес жұмыс жасатындығын және мемлекеттік қызметшілердің ар намысына тию мақсат болмағанын айтты.
Turaninfo.kz редакциясы Жамбыл облысы әкімдігі қызметкерлерінің әрекетін сөз бостандығына қысым көрсету және БАҚ жұмысына кедергі жасау деп бағалайды.
