Жамбыл облысында BIRGEMIZ: SAÝLYQ жалпыұлттық волонтерлік жобасы аясында жастардың қауіпсіздік мәдениетін қалыптастыруға бағытталған «Qauipsiz Qadam» атты танымдық әрі тәжірибелік іс-шаралар сериясы өтті. Аталған бастама Шерхан Мұртаза атындағы Халықаралық Тараз университетінде, Жамбыл инновациялық жоғары колледжінде және Тараз гуманитарлық-техникалық колледжінде ұйымдастырылды.
Іс-шаралар Жамбыл облысы ақпараттық және қоғамдық даму басқармасының мемлекеттік әлеуметтік тапсырысы аясында «Ақ Сұңқар» жастар қоғамдық бірлестігінің ұйымдастыруымен өткізілді. Жобаның негізгі мақсаты – жастар арасында қауіпсіздік мәдениетін қалыптастыру, төтенше жағдайларда дұрыс әрекет ету дағдыларын дамыту, алғашқы медициналық көмек көрсету бойынша білімдерін арттыру және азаматтық жауапкершілікті нығайту.
Кездесулердің модераторы, «Жамбыл облысы жастар ұйымдарының Қауымдастығы» заңды тұлғалар бірлестігінің президенті А.Намелбек қатысушыларды жобаның мақсат-міндеттерімен таныстырып, қауіпсіздік мәселелеріне бейжай қарамаудың маңыздылығына тоқталды. Оның айтуынша, алғашқы медициналық көмек көрсету дағдыларын меңгеру – адам өмірін сақтап қалудағы маңызды факторлардың бірі.
Іс-шараларға Қазақстан Республикасының Қызыл Ай Қоғамының мамандары арнайы қатысып, студент жастарға төтенше жағдайлар кезіндегі іс-қимыл алгоритмдері мен қауіпсіздік ережелері туралы жан-жақты ақпарат берді. Мамандар жазатайым оқиғалар кезінде зардап шеккен адамның жағдайын бағалау, жедел жәрдем шақыру тәртібі, қан кету, күйік, жарақаттану және есінен тану жағдайларында көрсетілетін алғашқы көмектің негізгі қағидаларын түсіндірді.
Теориялық бөлімнен кейін қатысушылар тәжірибелік сабақтарға қатысты. Қызыл Ай Қоғамының мамандары арнайы манекен арқылы жүрек-өкпе реанимациясын жүргізу тәсілдерін көрсетіп, алғашқы көмектің кезең-кезеңімен орындалу тәртібін түсіндірді. Студенттер тыныс алуды тексеру, жүрекке жанама массаж жасау, зардап шегушіні қауіпсіз қалыпқа келтіру және шұғыл жағдайда дұрыс шешім қабылдау әдістерін іс жүзінде орындап көрді.
Практикалық жұмыстар барысында жастар мамандардың нұсқауымен алғашқы көмек көрсету дағдыларын меңгеріп, төтенше жағдайларда өздерін сенімді ұстаудың маңызын түсінді. Сонымен қатар қатысушылар өздерін толғандырған сұрақтарға жауап алып, нақты өмірлік жағдайларда әрекет ету жолдары бойынша құнды кеңестерге ие болды.
Іс-шара аясында қоғамдық қауіпсіздік, өрт қауіпсіздігі, жол-көлік оқиғаларының алдын алу, сондай-ақ табиғи және техногендік сипаттағы төтенше жағдайларда әрекет ету мәселелері де кеңінен талқыланды. Спикерлер қауіп-қатердің алдын алу шаралары туралы түсіндіріп, қауіпсіздік мәдениетін қалыптастырудың қоғам үшін маңыздылығын ерекше атап өтті.
Ұйымдастырушылардың айтуынша, «Qauipsiz Qadam» жобасы жастардың өмірлік маңызды білім мен тәжірибені меңгеруіне бағытталған тиімді бастамаға айналды. Қатысушылар тек жаңа ақпарат алып қана қоймай, алған білімдерін тәжірибе жүзінде қолдануға мүмкіндік алды.
Осындай кездесулер жастардың қоғамдық белсенділігін арттырып, олардың кез келген төтенше жағдайда дұрыс шешім қабылдай алатын жауапты азамат ретінде қалыптасуына ықпал етеді. «Qauipsiz Qadam» жобасы қауіпсіздік мәдениетін нығайтуға, алғашқы көмек көрсету дағдыларын дамытуға және адам өмірінің құндылығын түсіндіруге бағытталған маңызды алаң ретінде өз тиімділігін көрсетті.
Ақпарат Жамбыл обылсы әкімдігі ақпарат және қоғамдық даму басқармасының мемлекеттік ақпараттық саясатын тапсырысы негізінде жарияланды.
