Егемен еліміздің іргесін бекітіп, өркендеуіне зор үлес қосып жүрген сондай озат тұлғалардың бірі – Талас өңірінің тумасы Бердияр Ахметов. Өз ісіне адалдықтың үлгісін көрсетіп, маңдай терімен абыройға бөленген бұл азаматты ауылдастары ерекше сыйлап, мақтан тұтады.
Бердияр Ділдәұлы 1959 жылы Талас ауданына қарасты Үшарал ауылында дүниеге келген. Осы ауылда орта мектепті тәмамдаған соң, бірден жергілікті кеңшарға жұмысшы болып орналасып, жастайынан еңбекке араласты. Жұмыс барысында техника саласына деген ерекше бейімі мен қызығушылығы байқалған соң, машина-трактор жүргізушілерін даярлайтын арнайы 6 айлық курсты оқып бітіріп, кәсіби маман атанады. Одан кейін Отан алдындағы екі жылдық әскери борышын өтеу кезінде де өзінің ұқыптылығымен, жоғары жауапкершілігімен көзге түседі. Әскерден оралған бойда «Талас» асыл тұқымды мал зауытына тракторшы болып жұмысқа орналасады. Ол кездері ауылдық жерде алып тракторды тізгіндеу үлкен мәртебе саналатын және бір өзі бір кеңшардың ауыр шаруасын атқаратын механизаторларды жұрт ерекше қадірлейтін. Бердияр да өзінің еңбекқорлығымен ауыл арасында тез сыйлы болды. Тракторшының тыныссыз тірлігі жылдың қай мезгілінде де толастамайды: ол бірде егіс даласында тер төксе, енді бірде құм ішіндегі шопандар ауылына жем-шөп, отын-су тасып, ауыл тұрғындарының кез келген тұрмыстық мұқтаждығын өтеуге белсене араласты. Ауылдастарының өтінішін ешқашан аяқсыз қалдырмай, үнемі жанашырлықпен қол ұшын созып жүретін механизатордың ел арасындағы салмағы әрдайым жоғары болды.
Бердияр Ділдәұлы өнер мен мәдениетке құрметті, үлгілі әулеттен шыққан. Ол қазақтың көрнекті ақыны, Мемлекеттік сыйлықтың лауреаты Күләш Ахметованың туған інісі. Алайда қарапайымдылықты жанына серік еткен тракторшы өмірде де, жұмыста да апасының абырой-беделін ешқашан алға тартқан емес және онымен мақтанып, атақ іздемеген. Ол тек өз еңбегімен алға шығып, ауданның дамуына қосқан үлесі үшін «Талас ауданына сіңірген еңбегі үшін» төсбелгісімен марапатталды. Соңғы жылдары «Талас-2020» әлеуметтік-кәсіпкерлік корпорациясында механизатор болып қызмет атқаратын ол, бүгінде зәулім зейнет жасына жетсе де, білікті маман ретінде әлі күнге дейін трактор рөлінен түспей еңбек етіп келеді. Оның осы қажырлы еңбегі ескеріліп, Талас ауданы әкімдігінің ауыл шаруашылығы бөлімі мен Үшарал ауылдық округі тарапынан жоғары мемлекеттік марапатқа ұсынылды. Нәтижесінде, Астана қаласында өткен Ауыл еңбеккерлерінің форумында Мемлекет басшысы Қасым-Жомарт Тоқаевтың өз қолынан ІІІ дәрежелі «Еңбек даңқы» орденін алды.
Жоғары марапатқа ие болған Бердияр Ахметов өз қуанышын былай деп жеткізді: «Мен мұндай деңгейде марапатталамын деп ешқашан ойламаған едім. Ауыл мен аудан көлеміндегі марапаттарды иеленіп жүрсек те, ел Президентінің қолынан тікелей «Еңбек даңқы» орденін алу мен үшін күтпеген зор қуаныш әрі өте жоғары құрмет болды. Мемлекет басшысының алдында тұрып қатты толқыдым, қатты қуандым. Бұл кездесу менің өмірімнің ең жарқын, ұмытылмас сәтіне айналды. Алдағы уақытта да Тәуелсіз қазақ елінің өркендеуі үшін еңбек адамы ретінде аянбай қызмет ете беремін. Көрсетілген бұл сенім үшін Мемлекет басшысына және мені осы марапатқа лайық деп тапқан барша азаматтарға шексіз алғысымды білдіремін».
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
