Жыл сайын облыс орталығындағы көрнекі орындар қатары артып келеді. Тараздықтар сәулетшілердің ойынан туған жобалардың қалай жүзеге асып жатқанын күнделікті көріп жүр десе де болады. Оның айқын бір мысалы деп «Тектұрмас» этно-тарихи кешенін атауға болады. Соңғы уақытта аумақ айтарлықтай өзгеріп шыға келді. Аймақтың түкпір-түкпірінен тұрғындар сонда ағылуда, шаһар қонақтары да сол жерді көріп қайтуды мақсат етеді.
«Тектұрмас» аумағындағы құрылыс жұмыстары қазір де жүріп жатыр. Сәулет және қала құрылысы басқармасының басшысы Арман Әбдешов сол маңайдағы жағажай мен жасанды сарқырама жобасы туралы баяндады. Жоспар бойынша ондағы демалушылар үшін қойылатын орындықтар ұлттық нақышта безендірілетін болады.
«Biz birgemiz» монументі де шаһардың мақтанышына айналуы тиіс. Жоба өз құрлымымен елдегі бірлік пен татулықты әспеттейді. Айта кетейік, монумент коронавируспен күрескен азаматтарға арнап орнатылып жатыр. Көпфигуралы композицияның қақ ортасында жер шары орналасқан. Түрлі мамандық иелерінің мүсіндері оны қол ұстаса айналдырып тұр. Кешен де, монумент те ұлттық нақышта орындалады.
Облыс әкіміне сондай-ақ, Өнер үйі, жастар орталығы, Аса ықшамауданында салынатын аллеялар жобалары да көрсетілді. Жергілікті сәулетшілер жоспарды өзге қалалардағы тәжірибеге қарап әзірлеген екен.
— Әр ғимарат бірегей болуы керек. Бірақ өзара үйлесім де ескерілгені жөн,- деп ескертті аймақ басшысы.
Арман Әбдешов Абай мен Жамбыл даңғылдары біршама өзгеретінін жеткізді.
— Ең бірінші кезекте сауатсыз жарнама ілінген қалқандар, билбордтарды жою керек. Рұқсат етілмеген жерде нысан салып жатқан кәсіпкерлерді жауапкершілікке тарту керек, — деп талап қойды Бердібек Сапарбаев.
Отырыс кезінде сондай-ақ, Гродеково мен Шу қаласын абаттандыру мәселелері де қаралды.
