Белгілі дінтанушы, имам Нұрлан Байжігітұлы Саудакент ауылында және Жаңатас қаласында болып, тұрғындармен кездесті.
Кездесу Сарысу ауданы әкімдігінің ішкі саясат бөлімінің «Сарысу ауданы тұрғындары арасында деструктивті діни идеологияға қарсы иммунитет қалыптастыру, жастар арасында дәстүрлі діннің маңыздылығын кеңінен түсіндіру» жобасы бойынша мемлекеттік әлеуметтік тапсырыс шеңберінде өткізілді. “Қоғамдағы дәстүрлі рухани-адамгершілік құндылықтарын қалыптастыру” тақырыбында өткен тәрбиелік мәні зор шараны ұйымдастырушы «Жамбыл облысы жастар ұйымдарының Қауымдастығы» заңды тұлғалар бірлестігі.
Нұрлан Байжігітұлы әлеуметтік желі арқылы да тәлім-тәрбие беріп отбасылық құндылықтарды дәріптеп жүр. Әлеуметтік желі арқылы көпшілікке танымал болған Нұрлан имаммен кездесуге келгендердің қарасы көп болды.
Кездесу барысында дін мен дәстүр, дәстүрлі діннің маңызы тұрғысында ашық әңгіме айтылды. Ұрпақ тәрбиесі, үлкенге ізет, кішіге құрмет, өмірде өз жолын дұрыс таңдау тақырыбында насихаттар, қазақтың ырымдары мен тиымдарын қолдану тәртібі кеңінен түсіндірілді.Тәрбие мен тағылымға толы бұл кездесу аудан тұрғындары үшін берері мол шара болды. Кездесу соңында Нұрлан Байжігітұлы кішкентай сәбидің тұсауын кесіп, батасы берді.
