Мойынқұм ауданының әкімі Ермек Карентаев Азия чемпионатының жеңімпазы, Күшаман ауылының тумасы Кемелбек Сабырбектің шаңырағына арнайы барып, жерлес спортшыны тарихи жетістігімен құттықтады. Кездесуге ауданның зиялы қауым өкілдері, ақсақалдар, ауыл тұрғындары, спорт ардагерлері мен жастар қатысып, ел мақтанышына айналған жас балуанға ақжарма тілектерін арнады.
Кездесу барысында аудан әкімі Ермек Амангелдіұлы Кемелбектің халықаралық аренадағы жеңісі аудан халқы үшін үлкен мәртебе екенін атап өтті. Оның айтуынша, спортшының қажырлы еңбегі мен табандылығының нәтижесінде қол жеткізген бұл жетістік жас ұрпаққа үлгі болып, елімізде бұқаралық спортты дамытуға серпін береді.
– Азия чемпионы атану – үлкен дайындықты, тынымсыз еңбекті және мықты мінезді талап ететін биік жетістік. Сенің жеңісің – тек өзіңнің немесе отбасыңның ғана емес, күллі Мойынқұм жұртшылығының ортақ қуанышы. Біз сенің жетістігіңмен мақтанамыз және алдағы жарыстарда да көк туымызды көкте желбірететініңе сенімдіміз, – деді аудан әкімі.
Кездесу барысында ауыл ақсақалдары жас чемпионға ақ баталарын беріп, ел намысын абыроймен қорғағаны үшін ризашылықтарын білдірді. Ауыл тұрғындары да жерлес спортшының жеңісін зор мақтанышпен қабылдап, оның алдағы халықаралық жарыстарда да жоғары нәтижелерге қол жеткізуіне тілектестік білдірді.
Өз кезегінде Кемелбек Сабырбек қолдау көрсеткен барша жерлестеріне алғысын айтып, алдағы мақсаттары туралы бөлісті. Оның айтуынша, қазіргі таңда басты міндет – әлем чемпионатына тыңғылықты дайындалып, Қазақстанның намысын абыроймен қорғау. Осы мақсатта спортшы жақын күндері Талдықорған қаласына аттанып, ұлттық құрама сапындағы оқу-жаттығу жиындарына қатысады.
Айта кетейік, биыл маусым айында Филиппин Республикасының Манила қаласында өткен самбодан Азия чемпионатында Кемелбек Сабырбек 92 келі салмақ дәрежесінде барлық қарсыластарынан басым түсіп, құрлық чемпионы атанды. Жас спортшының сенімді өнер көрсетуі нәтижесінде Қазақстан құрамасының қоржынына кезекті алтын медаль түсті.
Жалпы Азия чемпионатының қорытындысы бойынша Қазақстан құрамасы спорттық және жауынгерлік самбодан 15 алтын, 4 күміс және 6 қола медаль жеңіп алып, құрлық біріншілігіндегі ең үздік құрамалардың бірі екенін тағы бір мәрте дәлелдеді.
Кемелбек Сабырбектің бұл жеңісі – Мойынқұм ауданының ғана емес, бүкіл ел спортының мерейін үстем еткен айтулы жетістік. Жерлесімізге алдағы әлем чемпионатында сәттілік тілеп, Қазақстанның көк Туын халықаралық ареналарда биікке көтере беруіне тілектеспіз.
Материал «Мойынқұм ауданы әкімдігінің ішкі саясат бөлімі» КММ тапсырысы бойынша әзірленді.
