Төменгі палатаның бүгінгі отырысында палата спикері Ерлан Қошанов әріптесіне бірлесе атқарған жұмысы үшін алғыс айтып, жаңа қызметіне сәттілік тіледі.
Бұл кадрлық өзгеріс Мұрат Ергешбаевтың Қызылорда облысының әкімі лауазымына тағайындалуына байланысты болып отыр.
Орталық сайлау комиссиясының хатшысы Шавхат Өтемісов атап өткендей, Президенттің 2026 жылғы 8 мамырдағы Жарлығымен ол аймақ басшысы болып бекітілді, сондықтан заңнамаға сәйкес депутаттық мандатын тапсыру туралы ұсыныс енгізілді.
Мәжіліс депутаттары бұл шешімді қолдап, дауыс берді. Мұрат Ергешбаев өз кезегінде Мемлекет басшысына туған жерінде еңбек етуге мүмкіндік беріп, зор сенім артқаны үшін ризашылығын білдірді. Ол өзіне жүктелген жауапкершіліктің салмағын сезінетінін және халық үмітін ақтау үшін бар күш-жігерін жұмсайтынын жеткізді.
Сондай-ақ Парламент қабырғасында өткізген үш жылын қорытындылап, әріптестерімен бірге ел игілігі үшін заң шығару ісіне қосқан үлесін мақтан тұтатынын айтты. Жаңа әкім депутаттық кезеңде жинаған мол тәжірибесі ендігі кезекте мемлекет пен қоғамның дамуына жаңа мәртебеде қызмет ететініне сенімді.
