Алматы – Қызылорда бағытындағы 1200 шақырымдық автожол бойын тұрмыстық қалдықтардан тазарту мақсатында ұйымдастырылған «Таза Қазақстан» Road-эстафетасы аясындағы жұмыстар жалғасуда. Эстафета Алматы облысынан бастау алып, бүгін Жамбыл облысы аумағына келіп жетті.
Эко-акция қатысушыларын Алматы мен Жамбыл облыстарының шекарасынан «AMANAT» партиясы Жамбыл облыстық филиалының төрағасы Дауыл Бейсенқұлов бастаған партия мүшелері мен белсенділер салтанатты түрде қарсы алды.
Эстафета құрамында ҚР Парламенті Мәжілісінің депутаттары, «AMANAT» партиясы жанындағы «Жастар Рухы» Жастар қанатының төрағасы Ақерке Искандирова, сондай-ақ облыстық және аудандық мәслихат депутаттары бар. Қатысушылар республикалық маңызы бар автожол бойын тазарту жұмыстарымен қатар, «Вандализмге жол жоқ» акциясы аясында Қордай ауданындағы «Тұлғалар тұғыры» ескерткішінің айналасында абаттандыру және тазалық жұмыстарын жүргізді.
Сондай-ақ, ҚР Парламенті Мәжілісінің депутаттары мен «AMANAT» партиясы Жамбыл облыстық филиалының төрағасы Дауыл Бейсенқұлов Кенен ауылының тұрғындарымен кездесті. Кездесу барысында ауыл халқы өңірде өзекті болып тұрған бірқатар әлеуметтік мәселелерді көтеріп, олар бойынша пікір алмасу өтті. Жиынға қатысқан аудан әкімінің орынбасары мен жауапты бөлім басшылары қойылған сұрақтарға нақты әрі толыққанды жауаптар берді.
Аталған іс-шара Меркі ауданында да жалғасын тапты. «AMANAT» партиясының белсенділері, «Жастар рухы» жастар қанатының мүшелері Тәтті елді мекені мен Меркі ауылының арасындағы республикалық маңызы бар автожол бойында тұрмыстық қалдықтардан тазарту жұмыстарын жүргізіп, экологиялық мәдениетті қалыптастыруға өз үлестерін қосты.
Айта кетейік, Қордай ауданынан бастау алған экологиялық акция Меркі, Т.Рысқұлов, Байзақ аудандары мен Тараз қаласын қамти отырып, 2 қазан күні Жуалы ауданындағы Түркістан облысының шекарасында өз мәресіне жетпек. Эко-эстафетаға 300-ден астам белсенді жас қатысып, тазалық пен қоршаған ортаға жанашырлық үлгісін көрсетеді.
