Ал нашақорлық бар жерде есірткі бизнесінің қатарласа жүретіні белгілі. Нашақорлық қоғамымыздың тұрақтылығы мен мемлекетіміздің ұлттық қауіпсіздігіне де қатер төндіреді.
Қазақстанға бір қауіп төніп тұрғанын құзырлы органдардың мәліметтерінен байқауға болады. Бір мезгілде бірден бірнеше қалаларда тонналап, қаптаған қапшыққа толтырылған есірткі қоры тәркіленеді. Оның бәрі ел ішінде сатылғанда, қаншама қазақстандықтың түбіне жетуі ықтимал еді. Шынында есірткі саудасы есіріп барады , кейінгі кезде осы салада жария болған жаңалықтар қорқынышты жағынан бірінен-бірі өтеді. «Психоактивті заттар арасында жаңа түр ретінде «синтетикалық есірткілерді» тұтыну санының күрт өсу үрдісі белең алды. Бес жыл ішінде балалар мен ересектер арасындағы соны тұтынатындар контингенті 14 есе өсті.Ресми деректерге сенсек, еліміздегі нашақорлардың 60 пайыздан астамы 18-19 жас аралығындағы жастар екен.Өйткені, есірткінің есігі кірушілер үшін айқара ашық болғанымен, шығуға ұмтылғандарға мүлдем жабық деуге болады. Мысалы, Қазақстанда жастар арасында амфетаминдер (экстази, «скорость», метадон), ЛСД, ең сорақысы Мефедрон (меф) және өзге синтетикалық есірткілер танымал болды, оған олар «зияны шамалы» деп жеңіл қарайды. Шынында, наркологтардың түсіндіруінше, есірткіге, соның ішінде синтетикалық есірткіге басы байланған нашақорлардың бойын үнемі үрей буады, алапат депрессия қыспаққа алады, психозға ұшырайды. Есірткінің бұл түрі ыдырамай, адам ағзасынан сыртқа шығарылмай, химиялық элемент ретінде ұзақ сақталады. Мүлдем метаболизмнен өтпейтін есірткі түрлері пайда болуда. «Синтетиктің» жастардың бас миында, жұлын миында, иммундік және репродуктивті жүйелерінің жасушаларында жинақталуы мамандарды қатты алаңдатады.– Осылай иммундік жүйесін күйреткен нашақорларда түрлі инфекция өршиді, денесіне түскен жарақат ұзақ жазылмайды. Бас миының жұмысы бұзылып, ерте алжасу дамиды, назарын белгілі бір нысанға ұзақ шоғырландыра алмайды. Бар ойы – қаржы тауып, есірткі сатып алу ғана болады, бұл жолда ол ештеңеден тайынбайды. Салдарынан неше түрлі қылмыстар көбейюде. Қалай болғанда, мемлекеттің осы проблемаға баса назар аударғаны ел үшін өмірлік маңызды. Себебі қазіргі заманда әлдебір елді күйрету, болашағына балта шабу үшін шапқыншылық жасаудың қажеті болмай қалды. Жас ұрпағын шетінен арзан есірткіге отырғызса, ұлт өзі-ақ азғындалып бітпек. Сыртқы зәлім күштердің қаскөй пиғылы жүзеге аспауы, Ұлы даламыз бос қалмауы үшін мемлекет пен қоғам болып, әрбір жасты «жалғызым» деп танып, оның әрқайсысын нашақорлықтан аман сақтап қалу – елдің ендігі стратегиялық басты бір міндеті.
Сондықтан да, дендеп бара жатқан есірткі дертіне бүкіл қоғам болып бірлесе күресуіміз қажет!
Жамбыл облысы бойынша қылмыстық
істер жөніндегі мамандандырылған
ауданаралық соты әкімшісінің бас маман-
сот отырысының хатшысы Қ.Мутан
