Бұл туралы өңір басшысы өзінің әлеуметтік желідегі ресми парақшаларында жазды.
Бүгін облысымыздағы бірқатар белсенді жастармен кездестім.
Еркін форматта өткен кездесуде ашық әңгімелесіп, өзекті мәселелер мен олардың шешу жолдарын талқыладық.
Мемлекет Басшысы Қасым-Жомарт Тоқаев жастарға үлкен үміт артып отыр. Ел болашағы-жастардың қолында. Жастар саясатын дамыту жөніндегі жұмыстар әрдайым облыс басшылығының назарында болуы тиіс.
Әрі қарай әкім бәсекеге қабілетті, кәсіби жолда белгілі бір деңгейге жеткен жастарды өңірде тұрақтату үшін нақты шешімдер қабылдау керектігіне тоқталды.
Бүгінде еліміздің өңірлері арасында дарынды жастардың бәсекелесі қызу қарқын алуда.
Басты міндеттердің бірі — жас жамбылдықтардың өңірімізде тұрақтауы үшін нақты шаралар қабылдау. Қазіргі кезде облыста сапалы білім беру, салауатты өмір салтын ұстану, жұмысқа орналастыру және кәсібилікті дамыту үшін жан-жақты шаралар қолға алынуда. Бұл тұрғыда барлық сыбайлас жемқорлық тәуекелдерін жою, тиімді әлеуметтік тәуекелдерді белгілеу қажет. Осы орайда алғашқы нақты қадамдар жасалуда.
Денсаулық сақтау, білім беру және спорт салаларындағы басшылардың облыстық кадрлық резерві құрылатын болады.
Алдағы уақытта біз жаңа жұмыс орындарын құруға жұмыла әрекет етіп, жан-жақты жұмыс істеуіміз керек,-деп атап өтті өңір басшысы.
Одан бөлек жиын барысында Ербол Қарашөкеев жастардың ынтасын ашу үшін кәсіпкерлерді тойхана сынды көңіл көтеру нысандарын салуды азайтып, өндірістік кәсіпорындар тұрғызуға шақырды.
Тойхана, кафе және басқа да осындай көңіл көтеру нысандарының орнына жамбылдық кәсіпкерлерді шағын және орта өндірістік кәсіпорындар ашуға шақырудамыз. Бұл жас мамандарды жұмысқа орналастыруға үлкен мүмкіндік береді.
Облыста жастардың саны 354 мыңнан асады десек, бұл облыс халқының 29,1 пайызын құрайды. Жастардың шамамен 60 пайызы ауылда тұрады. Ауылдық елді мекендерді дамытуға, дарынды жастарға жағдай жасауға ерекше көңіл бөлінеді.
Қоғамның қозғаушы күші болып табылатын жастармен жиі кездесуге дайынмын. Жақын болашақта өңір халқының өмір сүру сапасы жастардың өмірлік ұстанымына байланысты болары сөзсіз. Сондықтан, олар ұсынған барлық пайдалы және маңызды жобаларды барынша қолдайтын боламыз,-деп түйіндеді аймақ басшысы.
Ербол Қарашөкеев жиын барысында өңірдегі ең белсенді жастармен пікір алмасуды да естен шығарған жоқ. Олардың көкейіндегі мәселелерге құлақ түріп, алдағы күні жастардың жайын күнтәртібінен түсірмейтінін жеткізді. Басқосудың соңында жастар облыс әкімімен естелік суретке түсті.
