Жамбыл облысының әкімі Ербол Қарашөкеев ел тарихындағы айрықша маңызға ие оқиға – жаңа, халықтық Конституцияның заңды күшіне енуіне орай тұрғындарды құттықтады.
Облыс әкімі жаңа Ата Заң тәуелсіз Қазақстанның баянды болашағына негіз қалайтын маңызды қадам екенін атап өтті.
«Жаңа Ата Заңымыз – тәуелсіз Қазақстанның баянды болашағына негіз қалайтын маңызды қадам. Ол мемлекетіміздің даму бағытын айқындап, қоғамдық келісім мен тұрақтылықты, азаматтардың құқықтары мен бостандықтарын қамтамасыз ететін берік құқықтық іргетасқа айналады», – деді Ербол Қарашөкеев.
Өңір басшысы Мемлекет басшысы айтқандай, жаңа Конституцияның заңды күшіне енуі ұлт тағдырына тікелей әсер ететін тарихи оқиға екенін атап өтті. Оның айтуынша, Ата Заң елдегі қоғамдық-саяси жаңғыруларға жол ашып, жаңа реформаларды іске асыруға берік негіз қалайды.
Сондай-ақ облыс әкімі алдағы кезеңде Қазақстан экономикасын жаңа деңгейге көтеру, энергетикалық және инфрақұрылымдық әлеуетті нығайту, цифрлық мемлекет қалыптастыру және адам капиталын дамыту сияқты маңызды міндеттер тұрғанын айтып, бұл мақсаттарға тек ел бірлігі мен ортақ жауапкершілік арқылы қол жеткізуге болатынын жеткізді.
Ербол Қарашөкеев өз құттықтауында Мемлекет басшысының: «Түптеп келгенде, баршамыздың мұратымыз – бір. Бұл – жас ұрпақтың жарқын болашағына жол ашатын өркениетті әрі озық мемлекет құру. Біздің Қазақстаннан басқа Отанымыз жоқ. Еліміздің ойдағыдай дамуы бізге ғана керек. Ұлт болып ұйысып, жұрт болып жұмыла білсек, біз кез келген белесті бағындырамыз, көздеген мақсатымыздың бәріне қол жеткіземіз» деген сөзін келтірді.
Облыс әкімі Жамбыл жұртшылығы тарихи өзгерістерді қолдап, ел игілігі жолында бірлік пен ынтымақтың жарқын үлгісін көрсететініне сенім білдіріп, тұрғындарға амандық, елге тыныштық және мемлекетіміздің өсіп-өркендеуін тіледі.
