Карантин кезінде халыққа қызмет көрсететін орталықтардың жұмысын тоқтату жөнінде шешім қабылданды. «Азаматтарға арналған үкімет» МК-ның баспасөз қызметі kolesa.kz тілшісіне хабарлағандай, шектеулер 15 сәуірге дейін енгізіледі, егер жағдай жақсармаса, одан әрі ұзартылуы мүмкін.
Бүгінгі күннен бастап машинаны бастапқы тіркеу, емтихан қабылдау, жүргізуші куәлігін беру қызметтері көрсетілмейді. Жүргізушілер тек egov.kz сайты арқылы көлігін қайта тіркеп, мерзімі өткен жүргізуші куәлігін ауыстыра алады. Дайын куәліктерді, мемлекеттік нөмірлер мен техникалық құжаттарды тапсырыс беру арқылы не құжат беретін терезелерді арнайы ашық қалдырған ХҚКО-нан алуға болады. Қызмет көрсету кестесі: дүйсенбі — жұма 9:00-ден 17:00-ге дейін, сенбі — 9:00-ден 14:00-ге дейін. Алматыда құжаттар мен нөмірлер тек Майлин, 85 мекенжайы бойынша, ал Шымкентте — Достық шағынауданында орналасқан ХҚКО-нда ғана беріледі.
Қандай да бір түсініктеме алу үшін ел азаматтары «Азаматтарға арналған үкімет» МК-ның байланыс орталығына 1414 нөмірі арқылы хабарласа алады. Кеңес берушілер дүйсенбі мен сенбі аралығында 9:00-ден 20:00-ге дейін жұмыс істейді. Қоңырау шалу тегін. Колл-орталықтар бір уақытта мыңнан аса адамға кеңес беруге қауқарлы.
Естеріңізге сала кетейік, Қазақстанда осы жылдың 16 наурызында төтенше жағдай жарияланды. Ал 19 наурыздан бастап Алматы мен Нұр-Сұлтанда карантин режимі енгізілді. 26 наурыздан бастап оңтүстік астанадағы ТЖО, автосалондар, көлік жуатын орындар мен бөлшек сататын дүкендер жабылды.
