Кеше Т.Рысқұлов аудан әкімдігінің үлкен мәжіліс залында аудан әкімі Асқар Қырықбаевтың төрағалығымен алқа мәжілісі өтті. Аудан әкімінің орынбасарлары мен ауыл әкімдері, бөлім, мекеме басшылары қатысқан жиында алдымен ауылшаруашылығы бөлімінің басшысы Ерғазы Еспенов баяндама жасап, егін орағы және мал азығын дайындау жұмыстарының жай-жапсарын сөз етті. Оның айтуынша, қазіргі таңда «Луговой жылқы зауыты» ЖШС мен «Ақбұлақ», «Құлбарақ», «Нұрдәулет» шаруа қожалықтары егін орағы жұмыстарын бастапты. Қалған шаруа қожалықтары да қажетті техникаларын жөндеп, сақадай сай отыр. Бүгін-ертең олар да егін орағы науқанына бел шеше кірісетін болады. Оған 194 комбайн, 80 трак
тор, 169 автокөлік қатысады. Жалпы, аудандағы егін шаруашылығымен айналысатын 393 шаруа қожалықта 620 адам тұрақты жұмыс істесе, қазіргідей маусымдық жұмыстар кезінде қосымша 550 адам жұмысқа тартылады екен.
– Зертхана мен шаруашылық мамандарының болжамынша күздік бидайдың әр гектарынан 24-26 центнерден, арпаның әр гектарынан 19-20 центнерден өнім алынады деп күтілуде. Болжам толық орындалса, қамбаға 192 мың тонна астық бастырылады, -дейді сала басшысы өз есебінде. Мамандардың бұлайша нық сеніммен сөйлеуінің де өзіндік мәні бар болып шықты. Өйткені, аудан
шаруашылықтары өнімділік деңгейін арттыру мақсатында техника паркін жаңалап келеді. – Биылғы жылдың өзінде 641,7 млн. теңгеге 10 шаруа қожалық 38 дана ауылшаруашылығы техникаларын алса, оның 8 данасы «Шәушен», «Еркін таң», «Қайқы» шаруа қожалықтарына тиесілі астық комбайндары. Жақын күндері «Шалқар» шаруа қожалығы да 8 дана комбайн алады. Келісім-шарты жасалып, қаражаты төленді, -деген Еспеновтың есебінен мал азығына қатысты да атқарылған жұмыстардан хабар алдық.
Ағымдағы жылы аудандағы 38500 гектар шабындықтар мен 6400 гектар көпжылдық
жоңышқа алқаптарынан 179500 тонна шөп, 12500 тонна сабан, 6000 тонна сүрлем, 6000 тонна пішендеме және 60000 тонна жем дайындауды жоспарлаған ауылшаруашылығы мамандары қазірдің өзінде 130200 тонна шөп дайындаған. Бұл жұмыстарды атқаруға 18 шөп ору агрегаты, 31 шөп тайлағыш, 33 шалғы, 7 шөп оратын комбайн, 68 трактор тіркемесімен жұмылдырылып келеді.
Алқа мәжілісінде бұдан өзге де өзекті мәселелер қаралып, тиісті қаулылар қабылданды.
