«Ұрпақтың денсаулығы – ұлттың саулығы» деп бекер айтылмаса керек. Дана халқымыз «Жақсы дәрігер ауруды жазады, жаман дәрігер ауруға ауру қосады» деп те айтады. Медицинаның атасы Ибн Синаның: «Дәрігердің үш қаруы бар: бірі – пышақ, екіншісі – шөп, үшіншісі – жылы сөз» деген екен. Осындай игі қасиеттер бойынан табылатын дәрігер ғана халықтың сүйіктісіне айналмақ. Сол себепті де дәрігерлік – жауапты мамандықтың бірі. Адам өміріне араша түсетін жандарға еш қателесуге болмайды. Дәрігерлер үнемі білімін жетілдіріп, ізденіс үстінде болып, өз саласында ем жүргізудің барлық тәсілдерін жетік меңгеруі тиіс.
Жамбыл облысы, Талас аудандық орталық ауруханасының терапиялық бөлімшесінің меңгерушісі – тұрғындардың алғысына бөленіп жүрген Күлзира Омарова.
Күлзира Шаймұратқызы 1961 жылы Қарағанды облысы, Саран қаласында қарапайым отбасында дүниеге келген. 1982 жылы Қарағанды медициналық институтының емдеу ісі факультетін бойынша тәмамдап, жас маман ретінде алғашқы еңбек жолын Жамбыл облысы, Талас ауданы, Қаратау қаласындағы емханада дәрігер-терапевт болып бастайды. Онда жемісті жұмыс істеп, жақсы қырынан танылған ол 1982 жылы №3 отбасылық дәрігерлік амбулаторияның меңгерушісі, 1999 жылдан бастап, бүгінге күнге дейін Талас аудандық орталық ауруханасының терапиялық бөлімінің меңгерушісі қызметін атқаруда.
Содан бері білікті дәрігер әріптестерімен бірге жалпы саны жиырма сегіз мыңға жуық халыққа медициналық қызмет көрсетуде өз үлесін қосып келеді. Оған келушілер өздерін жайдары мінезімен, орамды әзілімен қарсы алатын дәрігерге көңілдері толып, ризашылықтарын білдіруде. Шын мәнінде, жақсы дәрігер жабырқап келген жанның көңілін тауып, онымен әңгімелесіп, жағдайын да зерделей білуі керек. Сол кезде ғана емдеу процесі оң нәтижесін беретінін Күлзира Омарова да жақсы біледі.
Дәрігерді ауыл тұрғындары зор қуанышпен қарсы алады. Себебі, білікті маман, жақсы адам айналасына әрдайым сыйлы, құрметті. Осындай сыйластыққа, құрметке бөленіп жүрген дәрігер де бақытты болмақ. Өйткені, ол адамның жүрегіне жол таба білген жан.
Дәрігердің өмірлік ұстанымы – зейнеткерлік жасқа жетіп, одан әрі қарай да күш-жігерін халықтың денсаулығын түзетуге арнау. Өзін жақсы көретін тұрғындармен, ұжыммен бірге болу. Біліктілігін жастарға жол көрсетуге арнап, тәжірибесімен бөлісіп отыруды жөн санайды.
«Біздің кезімізде кітапханадан кітапханаға барып, ізденіп, тәжірибелі мұғалімдермен араласып, білмегенімізді сұрастырып оқитын едік. Ал, қазір интернет деген шыққан. Онымен қалай оқитынын, қалай білім алатынын білмедім. Практикалық, теориялық білім бар еді. Көзбен көріп, қолмен ұстап білімді жинақтау арқылы көп нәрсе есте қалатын. Жас дәрігерлер білмегенін сұрастырып, адамдармен араласып, жақсы жағынан көріне білсе, жақсы маман болып қалыптасады деп ойлаймын.
Ерінбей, ізденіп, тәжірибе алмаса білу керек. Ең бастысы, кішіпейіл, қарапайым, адами жоғары қасиеттерге ие болса, жақсы дәрігердің қатарынан көрінеді деп сенемін», – дейді ол. Күлзира Омарова «Денсаулық сақтау ісінің үздігі», «Кәсіподаққа сіңірген еңбегі үшін» төсбелгілерімен, «Қазақстан Республикасының тәуелсіздігіне 25 жыл» медалімен марапатталған. Дәрігердің еңбегі бағаланғаны – өзіне мәртебе, әрі қарай да оған рухани жігер мен күш беретін сенім.
Денсаулық сақтау басқармасының баспасөз қызметі
